Cangas entra a formar parte de l’Asociación Española de Ciudaes del Vinu

L’Asociación Española de Ciudaes del Vinu (ACEVIN) almitió definitivamente a Cangas del Narcea como miembru, na última asamblea celebrada en Jumilla a la qu’asistió en calidá d’invitáu l’alcade cangues, Jose Manuel Cuervo. Esta asociación, de la que formen parte cincuenta y cinco socios, dende ayuntamientos a diputaciones, busca agrupar los intereses de les comarques vitivinícoles cola fin de facer un analís estratexicu promocionando y diversificando esta actividá económica.

Ente los oxetivos d’ACEVIN alcuentrase la collaboración nes acciones concretes que tengan como fin el desarrollu económicu de les sos comunidaes; estudiar les formes d’intercambiu cultural, científicu, teconolóxicu y económico ente los municipios que s’integren nesta asociación; la cooperación nel ámbitu del mercáu de trabayu d’esti sector; asina como la organización de tou tipu d’alcuentros y actividaes rellacionaes col vinu.

L’Ayuntamientu de Cangas estima la importancia d’esta almisión na Asociación Española de Ciudaes del Vinu, sobromanera teniendo en cuenta la marca Rutas del Vinu d’España de la Secretería Xeneral de Turismu, asina como’l Programa Calidá nos productos turísticos, que busca la integración de los servicios turísticos d’interes existentes, traduciendose na creación d’una rede de cooperación empresarial y de cooperación público-privada na que participen bodegues, restoranes, hoteles, axencies de viaxes, y tou tipu d’alministraciones.