Canaries y Navarra xúntense al País Vascu na so rebelión contra la evaluación de Primaria

Canaries y Navarra xúntense al País Vascu na so rebelión contra la evaluación de Primaria
16 abril 13:13 2016 Imprimir

Cuando falta un mes pa qu’empecipien les pruebes de la nueva evaluación final de Primaria qu’afita la Lomce, el País Vascu y Canaries decidieron nun realizala esti cursu y Navarra tampoco la aplicará “pel momento”, mientres les comunidaes gobernaes pol PSOE, como l’asturiana, siguen cuestionándola.

Les resistencies concrétense tamién nos recursos que rexones como Asturies, Cantabria, la Comunidá Valenciana o Estremadura presentaron nel Tribunal Supremu contra’l real decretu que regula esta prueba, obligatoria pa tolos alumnos de 6º yá dende esti cursu, anque nun tien efectos académicos.

Doce comunidaes (toes menos les gobernaes pol PP, que sofiten la evaluación) pidieron una moratoria al Ministeriu d’Educación n’agostu pasáu. Agora reclámen-y una Conferencia Sectorial pa tratar toles evaluaciones qu’establez la Lomce.

Pel so llau, el ministru d’Educación en funciones, Íñigo Méndez de Vigo, amosóse seguro de que toles autonomíes van cumplir y van llevar a cabu la evaluación final de Primaria, pos “el respetu a la llei ye una característica del Estáu de Derechu”, declaró apocayá a Efe. Tamién ta abiertu a que les resultancies solo sían conocíes por padres, estudiantes y centros y que nun se publiquen en forma de ránkings.

Alrodiu de 480.000 alumnos de 12 años (edá teórica) tendrán de sometese a unes pruebes que pretenden comprobar les sos competencies en comunicación llingüística, Matemátiques, Ciencia y Tecnoloxía, según el llogru de los oxetivos educativos de la etapa. Ye esterna ya individualizada. El diseñu, aplicación y corrección correspuende a les comunidaes educatives,  ente que’l Gobiernu va asegurar unes característiques d’evaluación comunes mínimes pa toa España. Pel momento, solo delles autonomíes confirmaron yá les feches esactes de la evaluación, como La Rioxa, Madrid y Murcia.

Nel casu d’Asturies, el Principáu recurrió nel Supremu porque estes reválides ruempen colos criterios pedagóxicos de la evaluación continua, son un elementu de “distorsión”, con un costu emocional y económico” y ensin apurrir “nada positivu”, amás de “cuestionar” al profesoráu habitual de los centros.

  Categories: