Portada Conceyos CaleyAvilés va amosar los secretos del Parque Ferrera nuna visita guiada n’asturianu

CaleyAvilés va amosar los secretos del Parque Ferrera nuna visita guiada n’asturianu

by redacción asturnews

Esti vienres 3 d’agostu Caleyavilés va ufrir una visita guiada n’asturianu pel emblemáticu Parque Ferrera. El percorríu entamará a les 19 hores nel Edificiu de La Noria.

Sigue asina la tercer edición del ciclu Caleyavilés, entamáu pola Estaya de la Llingua del Conceyu d’Avilés, que dexa conocer los secretos de dalgunos de los sitios más importantes de la ciudá.

La d’esti vienres sedrá la cuarta de les cinco visites que se faen andando programaes pal ciclu d’esti añu y qu’entamaron el vienres 18 de mayu, coincidiendo col Día Internacional de los Museos. Nel mes de xunu la visita foi pel parque de La Madalena y en xunetu pel barriu de Sabugo, paraue del Muelle y paséu de la Ría. L’asistencia a estes actividaes creció respeuto a la edición anterior, muiestra del aumentu de la popularidá d’esta iniciativa.

L’actividá ye de baldre apuntándose primero, llamando al teléfolu 985 545 508 o mandando un corréu electrónicu a estayallingua@aviles.es

El programa de visites guiaes n’asturianu de lo que queda d’esti añu ye’l que vien darréu:

Vienres 3 d’agostu. 19 hores. Parque Ferrera. Puntu d’alcuentru: Edificiu de La Noria, dientro’l parque.
Vienres 7 de setiembre. 19 hores. Cascu Históricu. Puntu d’alcuentru: plaza de España, delantre  la Casa Conceyu

Cada visita vien a durar una hora y media, pa 25 places y es actividaes son de baldre, recomendándose llevar zapatos cómodos. P’apuntase hai que llamar al 985 545 508 o mandar un corréu electrónicu a estayallingua@aviles.es

Nos dos años anteriores l’actividá atraxo visitantes d’otros Conceyos d’Asturies, a los y les que-yos prestó muncho ver la ciudá milenaria d’una manera diferente, ciudá que tien una historia mui marcada dende la evolución de la so trazáu urbanu.

Esti ciclu de visites xurdió del ésitu de les que se ficieron en 2015 pel parque Ferrera y en 2016 al Muséu de la Historia Urbana nel Día Internacional de los Museos, cita esta que se caltuvo como entamu del ciclu.

Tamién te podria gustar