‘Calea’ o la música tradicional asturiana protagonista en Xixón

El  Festival Al Resve tien esti sábadu en Xixón como protagonista a Calea, un grupu principalmente vocal nel que les harmoníes y la instrumentación axúntense pa focalizar el so pesu nel calter modal y antigüu de la música tradicional asturiana.

“Calea” ye la palabra que les xentes del valle de Cuaya (Grau, Asturies) usen para referise al camín que ye malo de andar por tar llenu de piedres y maleza. Rubén Bada, Silvia Quesada y Leticia Baselgas lleven munchos años “caleando” polos rellabicu de la música. Esti nuevu proyectu, que fai que los trés caminen xuntos, reconduz de nuevu a estos músicos al empiezu de la so andadura creativa: la música tradicional asturiana.

Calea ye un grupu principalmente vocal nel que les harmoníes y la instrumentación axúntense pa focalizar el so pesu nel calter modal y antigüu de la música tradicional asturiana. Ciérrase un ciclu musical na vida de trés músicos ya intérpretes; un camín que solo s’apriende al zarapicar una y mil vegaes coles mesmes piedres na “calea”.

Festival Al Resve
Plaza Xovellanos de Xixón
17 de setiembre de 2022 a les 20 hores.