Portada Cine Buenafuente y Sílvia Abril busquen la risa nel segundu spot de los Goya

Buenafuente y Sílvia Abril busquen la risa nel segundu spot de los Goya

by redacción asturnews

Esti vienres, l’Academia del cine espublizó’l segundu spot de los Goya nel que Buenafuente y Sílvia Abril busquen la risa nun vídeu que cunta cola participación de les actrices Concha Velasco, Macarena García y Macarena Gómez; y los actores Pedro Casablanc y el Superlópez de Dani Rovira, ente otros.

Nel primer vídeu promocional de los premios Goya, llanzáu’l pasáu 4 de xineru, Andreu Buenafuente y Silvia Abril convirtiéronse en John Lennon y Yoko Ono. Nel vídeu, la pareya de presentadores de la 33ª edición de la gala del cine español, recibía dende la cama a representantes de l’asociación de preofendidos d’España, a quien animaben a “rise en paz” y pasalo bien na gran fiesta del cine español.

Esti vienres, l’Academia del cine espublizó’l segundu spot, nel que los conductores siguen compareciendo dende la cama y escuchen les reivindicaciones y entrugues de dellos colectivos. Col mensaxe de que quieren faer pasar una ratada a los espectadores y que la gala gúste-yos, Buenafuente y Abril defenden que “hai que rir más” –n’unu de los cartelos puede lleese “all you need is laugh”– nesti vídeu que cunta cola participación de les actrices Concha Velasco, Macarena García y Macarena Gómez; y los actores Pedro Casablanc y el Superlópez de Dani Rovira, ente otros. Para Buenafuente va ser la so tercer vegada como anfitrión del eventu, yá que presentó les gales de la 24 y 25 edición y con ésta última llogró’l so récord d’audiencia, con más de 4,5 millones d’espectadores.

Antes de la ceremonia, que va tener llugar el próximu 2 de febreru nel Palaciu de Congresos y Esposiciones FIBES Sevilla, desvelaráse la tercera de les pieces promocionales, que podrá vese nes canales de Televisión Española y en más de 1500 sales de cine de toa España, cola collaboración de FECE (Federación de Cines d’España).

Tamién te podria gustar