Portada Música BTS escueye Estaos Xuníos pa sos primeros conciertos con públicu

BTS escueye Estaos Xuníos pa sos primeros conciertos con públicu

by redacción asturnews

El fenómenu mundial del K-pop BTS va actuar en Los Ánxeles (EEXX) ente finales de payares y principios d’avientu, nos que van ser los sos primeros conciertos con públicu dende 2019 por cuenta de la pandemia, según anunció esta selmana’l so sellu.

La serie de conciertos, llamada ‘BTS permission to dancie on stage LA’, va tener llugar los díes 27 y 28 de payares y 1 y 2 d’avientu nel estadiu SoFi de la ciudá de la mariña oeste estadounidense.

Tratase de les primeres actuaciones en vivu que va ufiertar el septetu de K-pop dende les de xunu de 2019 en Seúl, y n’atayando la so xira mundial ‘Map of de Soul prevista pa 2020 por cuenta de la crisis sanitaria mundial causada pol coronavirus, según Big Hit Music, l’axencia del grupu.

El sellu esplicó qu’escoyó Estaos Xuníos como destín pa la so vuelta a los escenarios al tener en cuenta les restricciones pol virus que siguen vixentes en numberosos países, ente ellos la mesma Corea del Sur, onde tán prohibíos los espectáculos multitudinarios.

Big Hit tamién señaló que va siguir estudiando la posibilidá d’entamar shows adicionales en más localizaciones, dempués de que BTS llindárase a ufiertar actuaciones en llínea mientres la pandemia, ente elles delles al traviés de la so rede social, Weverse.

“Sabemos qu’esperastis muncho tiempu, y preparemos munches coses pa ufiertar una actuación inolvidable”, dixo J-Hope, unu de los integrantes del septetu nun vídeu xubíu pol grupu a Twitter y dedicáu a los sos siguidores.

Antes de llanzar el so cuartu álbum d’estudiu ‘Map of the Soul:7’, el grupu presentó en xineru de 2020 xuna xira que consistía de casi 40 conciertos en ciudaes de trés continentes y qu’incluyía un doble recital nel Estadiu Olímpicu Lluis Companys de Barcelona que tenía de suponer la primer actuación del grupu n’España.

Pero la pandemia obligó a la banda formada por RM, Jimin, Jin, J-Hope, V, Suga, y Jungkook a retardar la xira nun primer momentu y darréu a atayala definitivamente n’agostu del añu pasáu.

Tamién te podria gustar