‘Bohemian Rhapsody’ y ‘Green book’ pártense la gloria de los Globos d’Oru

09 xineru 09:30 2019 Imprimir

“Green Book”, con trés premios, y “Bohemian Rhapsody” y “Roma”, con dos, partiéronse la gloria na 76 edición de los Globos d’Oru, una ceremonia que sosprendió pol escasu impactu de “Nació una estrella” a pesar de les sos cinco nominaciones.

“Green Book”, de Peter Farrelly, llevóse’l galardón a la meyor película de comedia o musical, según los trofeos al meyor actor de repartida (Mahershala Ali) y meyor guion (Nick Vallelonga, Brian Currie y el mesmu Farrelly).

Pela so parte, “Bohemian Rhapsody” sosprendió a propios y estraños alzándose cola estauína a la meyor película de drama, ente que Rami Malek consiguió la reconocencia como meyor actor pola so semeya del difuntu Freddie Mercury. Otros dos premios collechó “Roma”, los de meyor película estranxera y meyor director, para’l mexicanu Alfonso Cuarón. “Roma” conviértese asina na segunda película mexicana en llevase’l premiu nesta categoría tres “Tizoc (Amor Indio)”, en 1958. Amás, Cuarón repite victoria como meyor director dempués de la llograda como por “Gravity”.

Solo otros dos cineastes llatinos llograron el troféu al meyor director con anterioridá: Guillermo del Toro (”La forma de l’agua”) y Alejandro González Iñárritu (”El renacíu”). “Gracies a Netflix por consiguir qu’esta película tan improbable consiguiera repercusión global”, dixo Cuarón sobro l’escenariu del hotel Beverly Hilton, de Los Ánxeles (California), antes d’asegurar que ta “eternamente estimosu” a les sos actrices Yalitza Aparicio y Marina de Tavira.

Intres dempués, amestó: “Siento qu’esta película dirixola Libo (la muyer que la crió), la mio madre, la mio familia… Esta película nun sería posible ensin los colores específicos que fixeron quien soi. Gracies familia, gracies México”. Unu de los premios más reñíos de la velada, el de meyor actriz de drama, foi parar a Glenn Close por La bona esposa”, que superó asina a Lady Gaga (”Nació una estrella”); Nicole Kidman (”Destroyer”); Melissa McCarthy (”¿Vas Poder perdoname dalgún día?”) y Rosamund Pike (”A Private War”).

 

  Categories: