Portada Fiestes Boal entama esti añu’l so primer “Outono Cultural”

Boal entama esti añu’l so primer “Outono Cultural”

by asturnet

L’Asociación Xuvenil “Mezᔠorganiza en collaboración col Principáu d’Asturies y l’Ayuntamientu de Boal la primer edición d’unes xornaes culturales qu’embaxu’l nome de “Outono Cultural” van desendolcase en Boal los díes 25 d’ochobre, 29 de payares y 13 d’avientu.

Los actos van entamar coincidiendo col día de la XXIII Feria de la Miel cuando’l grupu de folk Felpeyu ponga la so música a partir de les once de la nueche con un conciertu que ta enxertáu nel programa de la feria.

El siguiente pasu nesti ciclo cultural va ser el 29 de payares, en que tan previstes gaites, cantares y bouzoukis, xunta dos charres: la primera, a les doce la mañana, va tratar sobre’l “Asturcón roxo ou gurrufeiro” por David Martín Cisneros y la segunda, a les seis de la tarde, va centrase na “Arquitectura tradicional en Bual” a cargo de Ástur Paredes. La nota melódica de la xornada va ponela Verdasca, qu’actuará a les ocho la tarde.

La última xornada va ser el 13 d’avientu, entamando a las doce la mañana , con una charra na que Xosé Miguel Suárez Fernández va presentar el so estudiu “Gaiteiros, cuartetos y outros músicos populares nel estremo máis occidental d’Asturias”. Pola tarde, Xosé Antón Fernández, más conocido por “Ambás”, fadrá un análisis de la tradición oral nel occidente d’Asturies. Y Pa pesllaar esta primer edición, a les ocho la tarde, el tríu Tuenda va ufrir la so particular reellaboración de romances, “añadas”, “muñeiras”, xotas y medias vueltas.

Menos el conciertu de Felpeyu, que va a ser nel Parque, el restu d’actos han celebrase na Casa de la Cultura de Boal.

Tamién te podria gustar