Portada Comunicación Blanca Fernández Quintana gana’l ‘María Josefa Canellada’

Blanca Fernández Quintana gana’l ‘María Josefa Canellada’

by redacción asturnews

Blanca Fernández Quintana vieno acabante algamar el Premiu «María Josefa Canellada» de Lliteratura Infantil y Xuvenil con El cartafueyu d’Alquimia, obra de fantasía na que que trata con aciertu les rellaciones familiares de dos hermanos que nun conocen quién foi so madre.

Blanca Fernández Quintana (Bimenes, 1994) ye la ganadora del XV Premiu «María Josefa Canellada» de Lliteratura Infantil y Xuvenil n’asturianu, que promueve la Conseyería de Cultura, Política Llingüística y Turismu. La so novela El cartafueyu d’Alquimia foi reconocida pol xuráu del gallardón pol so «destacable retratu de los personaxes y la evolución que siguen a lo llargo de la obra».

La obra ganadora ye una novela p’adolescentes que trata con aciertu les rellaciones familiares de dos hermanos que nun conocen quién foi so madre. El Premiu «María Josefa Canellada» de Lliteratura Infantil y Xuvenil n’asturianu ta dotáu con 6.000 euros y la publicación de la obra.

El xuráu, presidíu pol director xeneral de Política Llingüística, Antón García, aconceyó esta mañana na Casa Conceyu de Cabranes y tuvo compuestu por Gerardo Fabián Fernández, alcalde de Cabranes; Xilberto Llano, ganador de la edición anterior del gallardón; Alba Carballo, filóloga y escritora; Mónica Rodríguez; Alonso Zamora, fíu de M.ª Josefa Canellada, y Juncal García Velasco, xefa del Serviciu de Planificación y Conocimientu de la Llingua Asturiana.

Blanca Fernández Quintana ye graduada d’Estudios Clásicos y Románicos y exerce como docente nel IES de Tinéu, trabayu que compaxina cola escritura. Ganó yá dellos concursos lliterarios y l’añu pasáu llogró’l Premiu «Enriqueta González Rubín» de Narrativa Moza n’asturianu pola so obra No que cinca los seres de lleenda. Tamién ye autora de L’home de les caparines y Trovadoresca.

Tamién te podria gustar