Bimenes podría declarar otra vuelta la oficialidá

L’equipu de gobiernu del Ayuntamientu de Bimenes fizo anuncia esti primer día de marzu que tien camentao plantegar un Plenu en xunetu pa declarar otra vuelta la oficialidá de la llingua asturiana venti años depués.

L’anuncia espardiose esti martes peles redes sociales y punxo al conceyu yerbatu nel puntu de mira tres de convertise hai 20 años nel primer ayuntamientu del país en declarar la oficialidá. l’anuncia ponía esti miércoles como fecha del entamu d’aconceyamientos con un coleutivu llocal pa empezar a poner les bases al procesu, pero nes redes sociales del Partíu Asturianista de Bimenes entá nun apaecía esti miércoles al meudía denguna mención al respective.

L’alcalde Aitor García Corte, del Partíu Asturianista (PAS) buscaría colocar otra vuelta a Bimenes como cabezaleru na llucha polos derechos llingüísticos  de tolos asturianos y, al empar, recuperar la importancia de la Fiesta de la Oficialidá de la Llingua Asturiana que tolos años conmemora la primer declaración d’oficialidá, del 5 de xunetu del 1997 cuando yera alcalde Joaquín García Gutiérrez.