Bimenes dedica una xornada a la lliteratura y entrega los premios del concursu de cuentos

El vienres pasáu enllenóse’l salón d’actos de la Casa Cultura de Santuyano p’acoyer la cellebración d’una Xornada Lliteraria. Nel trescursu de la mesma entregáronse los premios del “XV Concursu de Cuentos pola Oficialidá del Asturianu” a Héctor Pérez Iglesias, Rubén d’Areñes y Quique Faes, escritores qu’algamaren el primer, segundu y tercer premiu respeutivamente. Xulio Vixil, miembru permanente del xuráu, punxo la so voz pa lleer el cuentu ganador, énte l’ausencia d’Héctor Pérez, que nun pudo averase hasta Bimenes por motivos llaborales. Tamién se presentó’l llibru “Poemes del últimu salvaxe”, de Daniel García Granda, y cuntóse col acompañamientu musical de Sergio Catalán Nava y Karina Gutiérrez Vallina, qu’interpretaren delles pieces del so repertoriu de música tradicional a lo llargo la velada.

Fueron dos los momentos más emotivos de la tarde. Per un llau, l’alcordanza que Xulio Vixil fizo del fallecíu José Emilio González Aller, alcalde de Bimenes hasta va poco más d’un mes, del que destacó’l so sofitu al certame lliterariu y l’enfotu que ponía na defensa del nuestru idioma. Emotivu foi tamién el reconocimientu que l’Ayuntamientu Bimenes-y fizo a la moza yerbata, de namás que 18 años, Blanca Inés Fernández Quintana, a la que-y apurrió una placa conmemorativa polos recientes ésitos algamaos nel que tovía ye namás que l’entamu de la so carrera lliteraria. Blanca Fernández ta acabante de llegar de Huelva, ciudá na que recoyó’l primer premiu na modalidá de Bachilleratu del “XIV Concurso de Narraciones Breves Fernando Belmonte”, un certame en castellán nel que participen decenes de persones de tol Estáu español y de Sudamérica. Esta autora asoleyó amás apocayá dalgunos de los sos primeros testos na revista Formientu.