Bilbo repasa 90 años de cartelos publicitarios

Bilbo repasa 90 años de cartelos publicitarios
07 ochobre 12:34 2015 Imprimir

El Muséu de Belles Artes de Bilbao esamina na esposición “Mensaxes dende la paré. Cartelos na colección del Muséu de Belles Artes (1886-1975)” casi 90 años d’hestoria na evolución del cartelu publicitario y propagandístico.

L’amuesa, que va dende finales del sieglu XIX a finales del XX ta comisariada pol profesor d’Hestoria del Arte y la Música de la UPV Mikel Bilbao. Les obres espuestes vienen de los estensos fondos de cartelos que tien la pinacoteca bilbaina, con más de 400 pieces, con obres de cartelistes de sonadía internacional, tanto estranxeros como españoles.

Ente los estranxeros destaca’l cartelista francés del sieglu XIX Jules Cheret, asina como los contemporaneos Milton Glaser, autor de la portada del nomáu discu de grandes ésitos de Bob Dylan en 1967, Shigeo Fukuda, Herbert Bayer, o tamién el fotógrafu Richard Avedon, ensin escaecer a Saul Bass, ceador de cartelos anunciadores de películes d’Otto Preminger.

Y ente los españoles figuren pintores como Pablo Picasso y Joan Miró, o los artistes vascos Chillida, Ibarrola, Andrés Nagel, Guiard, Arteta y Guezala. La esposición esibe un total de 227 cartelos de la colección propia del Muséu, dende 1886, el primeru d’ellos, realizáu en blancu y negru por Adolfo Guiard p’anunciar les corríes entamaes en Bilbo los díes 2 y 9 de mayu de dichu añu, hasta 1975, añu al que pertenez la obra “Victory 1945″ del xaponés Shigeo Fukuda.

L’amuesa va poder visitase dende esta selmana nel muséu hasta’l 18 de xineru del añu entrante.

  Article "tagged" as:
  Categories:
Loading Facebook Comments ...