Belenos presenta “Los llavaderos del Conceyu Piloña”

Belenos presenta “Los llavaderos del Conceyu Piloña”
12 setiembre 15:50 2015 Imprimir

La Fundación Belenos vieno acabante d’asoleyar “Los llavaderos del Conceyu Piloña”, un llibru que fai’l númberu 9 de la so coleición Cartafueyos de Belenos y del que ye autor l’etnógrafu piloñés Daniel Cueli Canto (Coya, 1978).

Cueli ye precisamente miembru de la Fundación Belenos y del Conseyu Editorial de la so revista Asturies, memoria encesa d’un país, y el so llibru ye’l resultáu d’un trabayu de trés años que lu llevó, ente otres coses, a censar tolos llavaderos d’esti conceyu del centru-oriente d’Asturies.

Portada del llibru Los llavaderos del Conceyu Piloña

Portada del llibru

La obra, de 72 páxines ya ilustrada con 84 semeyes a color, divídese en cuatro partes: un Entamu, nel que s’espliquen les razones que llevaron a iguala; unes Notes, nes que se traten estensamente delles cuestiones al rodiu los llavaderos de Piloña (cronoloxía, tipoloxía, elementos arreyaos…); darréu apúrrese’l Censu de los llavaderos públicos esistentes nel conceyu y, por último, apaecen dellos Apéndices empobinaos a tratar dalgunes cuestiones d’una forma más específica.

La coordinación editorial, el diseñu y la maquetación corrieren a cargu d’Ástur Paredes, tamién etnógrafu y miembru de la Fundación Belenos.

La presentación pública del llibru va tener llugar en L’Infiestu, nel marcu del llavaderu públicu de Los Caños, allugáu nel barriu de Triana de la capital piloñesa, el sábadu 19 de setiembre de magar les 12’30 hores. Dempués el llibru podrá mercase, a un preciu de 15 €, nes llibreríes Rima y Jambrina (L’Infiestu), La Escolar (Nava), Cervantes y Ojanguren (Uviéu) y Paradiso (Xixón).

Loading Facebook Comments ...