Portada Educación Baxen les notes de corte na nueva axudicación de places de la Universidá

Baxen les notes de corte na nueva axudicación de places de la Universidá

by redacción asturnews
Foto: Iglesias Riveiro (https://www.flickr.com/photos/riveiro/)

La Universidá d’Uviéu abrió esta selmana pasada’l nuevu periodu de matriculación, pa los alumnos que consiguieren plaza na segunda llista de persones almitíes pa los estudios de grau. Como cada añu, una vegada que se cierra’l primer periodu vuelven ponese a disposición les places que quedaren disponibles, yá que magar tener tolos graos en primer momentu llista d’espera lo cierto ye que ye habitual que dellos estudiantes finalmente nun formalicen la so matrícula, por motivos varios.

Asina, tres esta segunda alxudicación les notes de corte baxaron. Nos graos más demandaos siguen siendo altes, sía que non. Medicina, por casu, qu’encabeza’l ranking, pasó de 12,79 a 12,643. Biotecnoloxía baxó de 12,54 a 12,2. Matemátiques ye quiciabes unu de los graos que más notó’l cambéu: de 12,218 a 11,684. En cuanto al nuevu grau que va estrenar la Universidá d’Uviéu en Xixón, y que xeneró enforma interés, Organización Industrial, baxó tamién, del 9,058 a un 8,248. Sía que non, nin siquier estes son les notes de corte definitives, yá que nun se cierren hasta’l mes d’ochobre, cuando van rematar tolos periodos de matriculación.

Enagora, los que llograren una plaza nes titulaciones nesti segundu llistáu pueden formalizar la so matrícula hasta esti llunes 29 a les 14 hores.

Tamién te podria gustar