Barbón garantiza que se va contratar más profesoráu pal cursu

Barbón garantiza que se va contratar más profesoráu pal cursu y vieno acabante almitir que va haber que reorientar los presupuestos rexonales porque’l fondu estatal nun va cubrir toles necesidaes.

El presidente del Principáu, Adrián Barbón, garantizó ayeri que va haber más profesoráu pa poder atender a les necesidaes de los centros, que van cuntar con munches unidaes desdoblaes pa cumplir coles midíes de seguridá necesaries y el protocolu qu’Asturies y la mayor parte de comunidaes apautaron col Ministeriu d’Educación pa diseñar un cursu basicamente presencial. Hai dos escurres sobre la mesa: establecer una distancia de 1,5 metros ente alumnos o entamar grupos ‘burbuxa’ d’un máximu de 20 estudiantes, con un docente de referencia. Eso aplicaríase hasta cuatro de Primaria.

Adrián Barbón contestaba asina nel Plenu de la Xunta Xeneral a una entruga de la vocera del PP, Teresa Mallada. El presidente señaló que los 2.000 millones que’l Gobiernu central va apurrir a les comunidaes nel denomináu Fondu COVID destinaos a educación nun van dexar cubrir el gastu adicional al que va tener que faer frente’l Principáu.

Asina, avanzó que’l Gobiernu rexonal va reorientar los presupuestos vixentes y va buscar más recursos pa dedicalos al sistema educativu, cuidndao que les condiciones pal próximu cursu, a la espera de que se definan de forma definitiva, van obligar a desdoblar aules y va  necesitase contratar más personal.