Banksy denuncia la falta de vivienda con un nuevu mural

11 avientu 09:03 2019 Imprimir

La ciudá inglesa de Birmingham amaneció esti llunes con una nueva obra de Banksy. Na cai Vyse, los transeúntes pudieron ver el dibuxu de dos renos, asemeyando tirar d’un trinéu, que ye en realidá un bancu de la ciudá.

El mesmu artista xubió’l trabayu tantu a la so web como a la so Instagram, asumiendo asina la so autoría. Nel vídeu que xubió nes redes sociales, el bancu ta ocupáu por un home ensin llar, identificáu como Ryan.

D’esta miente, el de Bristol quixo denunciar la falta de vivienda y d’oportunidaes. Una situación pola que, desgraciadamente, pasen munches persones en Reinu Uníu, apunta l’artista.

Nos 20 minutos que dura la filmación, delles persones avérense pa ufierta-y bebida caliente, chocolate y un encendedor. Too, ensin que Ryan pidiera nada. Bien probablemente fuera la pintura lo qu’animó a los transeúntes a averase al méndigu.

Los residentes de Birmingham aplaudieron nes redes tantu’l mural como’l mensaxe d’esti. A primeros d’añu, ilusionáronse pensando que l’autor dexárase pasar pol barriu. Sicasí, foi una falsa alarma, pos se reveló que detrás d’un graffiti d’estilu bien similar a los suyos taba la organización Compassion in World Farming.

  Categories: