Banksy crea alderique al so pesar nuna nueva esposición comercial en Madrid

Banksy crea alderique al so pesar nuna nueva esposición comercial en Madrid
06 avientu 10:20 2020 Imprimir

Una cosa ye que l’esmucidizu y tresgresor Banksy xenere discutiniu allá onde practica’l so arte o les sos prevocaciones. Y otra bien distinta ye que terceres persones y empreses aprovechense d’ello y del anonimatu del autor pa, ensin el so consentimientu, faer negociu a mariña de só. Esi ye l’alderique que xurde en Madrid con una esposición comercial abierta recién.

Esta foi la gran tema de la mayoría de les entrugues, más dalguna intervención non periodística, mientres la presentación de la nueva amuesa con obres del misteriosu artista británicu que dende esti xueves y hasta el 9 de mayu va celebrar nel Círculu de Belles Artes de Madrid. Una esposición de calter marcadamente comercial, non yá pola vienta de productos rellacionaos –lo que faen tolos museos– sinón pol altu preciu de la entrada: 16,5 euros per visitante.

L’amuesa, con más de 70 pieces de les que 48 son serigrafíes y 18 “obres úniques” (non reproducíes), vien entamada pola compañía Sold Out sol comisariáu del espertu rusu Alexander Nachkebiya, quien nun pudo asistir nin comparecer en videoconferencia al topase ingresáu por Covid.

L’asociación entre Nachkebiya y dicha empresa española ye la mesma sobro la que hai xusto dos años yá pivotó una gran retrospectiva con pieces de Banksy na ferial de Ifema, onde Sold Out hai entamando exhibiciones de gran ésitu sobre Harry Potter, Pink Floyd, Xuegu de tronos o la tumba de Tutankamón. La de Banksi del 2018-2019, titulada Xeniu o gamberru, atraxo a 600.000 persones, según la compañía.

La nueva esposición llámase Banksy, the street is a canvas (la cai ye un llenzu). Y, anque’l sociu director de Sold Out, Rafa Giménez, aseguró que “nun tien nada que ver” cola anterior, munches serigrafíes repítense y l’aire de dambes ye similar. Sía que non, de lo que se trata nesta ocasión ye de “cavilgar sobro’l papel críticu del arte, la llibertá artística y la censura”, según sobro les contradicciones internes” na producción de Banksy, dixo’l director del Círculu de Belles Artes, Valerio Rocco.

Como exemplu ye eses contradicciones, ironíes y autoironías del artista, Giménez refirióse pela so parte a un testu del autor que na amuesa acompaña a los sos ataques gráficos al consumismu: “El mundu nun va camudar hasta que’l capitalismu nun caya; mentanto, lo meyor ye que vaigamos de compres pa consolanos”. Abargana del cartelu con estes palabres amuésase’l dibuxu d’un Cristu crucificáu que con dambes manos mancaes sostien bolses de la compra.

Giménez aportunó de primeres en que les reproducciones y “obres úniques” del artista supuestamente residente en Bristol cunten con “certificáu d’autenticidá expedíu por el mesmu ceador sol peculiar sistema que tien establecíu: la entrega de mediu billete falsu cola semeya de Lady Di que la so otra metá se la queda él, y tou so supervisión de la entidá Pest Control (control de plaxos).

Pero la próxima inclusión na amuesa d’un cachu de paré con unu de los sos grafitis –la pieza entá nun había llegáu ayeri a la sala por problemes loxísticos”– amenó la crítica más severa de les que se fixeron na rueda de prensa. Dempués de delles entrugues de tonu escépticu o incisivu sobro la falta d’autorización o posible refugu de Banksy a la esposición, la historiadora del arte Esther Fernández Castelo, especializada n’intervenciones artístiques na cai, negó que les pintaes nun muriu puedan esponese y vendese ensin permisu del autor.

  Categories: