Bacotexo pon música al nomamientu de Pablo Suárez y Xosé Antón Suárez como académicos

06 mayu 15:55 2016 Imprimir

El grupu de rock n’eonaviego BacoTexo, el cantante Andrés Cueli y el gaiteru Álvaro Álvarez van poner música al nomamientu de Pablo Suárez García y Xosé Antón Suárez Puente como académicos de l’Academia de la Llingua Asturiana na Xunta Estraordinaria de la institución que va entamar esti vienres a les 20,30 hores nel Teatru Campoamor y cola que se celebra’l Dïa de les Lletres.

Andrés Cueli va abrir l’actu institucional del Dïa de les Lletres interpretando’l cantar “Caminín del Puertu” y el gaiteru Álvaro Álvarez tocará a la gaita la “Xota de Peñamellera”, enantes de dar pasu al actu académicu nel que se van nomar los dos nuevos académicos correspondientes, los doctores D. Pablo Suárez García y D. Xosé Antón Suárez Puente.

Tres de los discursos de los dos nuevos académicos, la presidenta de la institución, Ana Cano, fadrá’l tradicional discursu añal nesta Xunta Estraordinaria, y los presentadores del actu, Sonia Avellaneda y Próspero Morán, darán llectura a dellos poemes asoleyaos nel númberu estraordinariu de la revista Lletres Asturianes.

Tres de la llectura,  vendrá l’actuación del grupu de rock n’eonaviegu “Bacotexo” que va tocar los temes Eclipse, El día da procesión, Beila, Contando os cuartos, Queimar el cielo y Campos de meiz.

Pablo Suárez García (Udrión-Trubia, 1973) ye Llicenciáu n’Inxeniería Superior de Telecomunicaciones, en Matemátiques y en Filoloxía Hispánica; Doctor en Filoloxía pola Universidá d’Uviéu y Especialista en Filoloxía Asturiana. Ye autor de traducciones al asturianu y ediciones crítiques d’obres como’l Tirán el Blancu, coeditáu cola Acadèmia Valenciana de la Llengua, Proses profanes y la Tragédia de Caldesa de Joan Roís de Corella. Tamién ye’l traductor de la versión al asturianu d’El Quixote de Miguel de Cervantes. Collaborador d’esta Academia, participa nes «Xornaes Internacionales d’Estudiu» y foi premiáu en delles ocasiones nos Concursos d’Investigación de la institución.

Xosé Antón Suárez Puente (Uviéu, 1971) ye Doctor en Bioloxía y miembru destacáu del Institutu Universitariu d’Oncoloxía de la Universidá d’Uviéu que dirixe’l profesor Carlos López Otín. Suárez Puente emplega davezu l’asturianu en conferencies y seminarios de divulgación de los avances científicos del IUOPA. Asina mesmo, ye traductor de programes informáticos al asturianu, como’l navegador Firefox, y gracies al so llabor llogróse la reconocencia per parte del comité ISO del códigu ISO-639 pa la llingua asturiana (ast), requisitu indispensable pa la so reconocencia n’Internet. Collaborador d’esta institución, ye miembru del Comité d’Espublización de la revista dixital Ciencies. Cartafueyos asturianos de Ciencia y Teunoloxía, editada pola Universidá d’Uviéu y esta Academia, y onde tien asoleyaos dellos artículos.

  Categories:
Loading Facebook Comments ...