Avilés ye estos díes la capital nacional de la fantasía y la ci-fi col Festival Celsius 232

Avilés ye estos díes la capital nacional de la fantasía y la ci-fi col Festival Celsius 232
20 xunetu 13:30 2022 Imprimir

Avilés ye estos díes la capital nacional del terror, la fantasía y la ciencia ficción nun Festival Celsius 232 con más de 200 protagonistes ente los que s’alcuentren xente como Paul Tremblay, Stephen Graham Jones, Mariana Enríquez y Grady Hendrix, bien distintos na so forma d’encetar la escritura, pero con una traza común: la so estraordinaria brillantez.

Como cada añu, cuando llega’l mes d’agostu, Avilés conviértes mientres cinco díes nel focu para toles persones amigues del terror, la fantasía y la ciencia ficción, gracies a un Festival Celsius 232 qu’algama la so undécima edición, y va celebrase dende esti martes, 19 de xunetu, hasta al sábadu 23, cola redolada de la Casa de Cultura como exa.

Más de 200 autores y autores, algamando un añu más la paridá, que destaquen n’ámbitos creativos cada vez más interconectaos, como’l certame reflexa: la lliteratura, el cine, la televisión, los videoxuegos o’l cómic. Referentes internacionales, protagonistes que guarden un espaciu na so axenda para visitar Avilés y ponese a disposición del públicu.

Con un cartelu obra de Javier Olivares, protagonizáu pol so personaxe Alexandra Tintanegra, nel que pueden atopase pincelaes d’espresionismu alemán, cubismu, ciencia ficción y pulp, el Celsius vuelve crecer. Y con un nome que va sobrevolar por tola edición, el de Fernando Maríes, autor fundamental de les lletres españoles nes últimes décades, comprometíu dende l’entamu col festival, impulsor de Fíos de Mary Shelley, fináu anguaño, y a quien se-y va brindar un sentíu homenaxe’l sábadu.

Nun Celsius qu’axunta n’Avilés al meyor del panorama mundial del xéneru de terror, cola participación de Paul Tremblay, Stephen Graham Jones, Mariana Enríquez y Grady Hendrix, bien distintes na so forma d’encetar la escritura, pero con una traza común: la so estraordinaria brillantez.

Relluma tamién la lliteratura xuvenil, cola presencia de Neal Shusterman, premiu nacional d’Estaos Xuníos, amás de Naomi Novik y Marie Lu. Encabecen una nutrida representación de lo meyor que se ta faciendo pa la mocedá tanto dientro como fora de les fronteres españoles. Tampoco van faltar grandes iconos d’unu de los ámbitos que conformen l’escayu dorsal del certame, la ciencia ficción, con personaxes indispensables, como Joe Abrecrombie, Ellen Kushner o Kelly Robson.

En cuanto al cómic, unu de los grandes protagonistes ye John Wagner, ceador de “Xuez Dredd” y escritor de “Una hestoria de violencia”, que convirtió n’obra maestra del cine contemporaneu David Cronenberg. Pero tamién Chris Claremont, responsable mientres décades de les aventures de la Patrulla X; nel mundu de la ilustración, Charres Vess y la so capacidá pa tresportar a mundos de fantasía; o na animación N. D. Stephenson, ceadora de “She-Ra”.

Cada vegada con mayor relieve apaez el mundu del videoxuegu, que va cuntar con Marianne Krawzick, guionista de la saga “God of War”, o les ganadores de los dos primeros premio CIMA GAMES, que s’apurren nel Celsius, como son Tatiana Delgado, que lu llevó en 2021, y Mar Hernández, nesti 2022.

Tamién se van apurrir los otros dos premios especiales que concede’l Festival Celsius, los VII Kelvin 505 a les meyores noveles de terror, fantasía y ciencia ficción publicaes en 2021, y los V premios Lorna a los meyores cómics de xéneru.

Más información

  Categories: