Avilés y la Universidá d’Uviéu roblen el conveniu pa crear la Cátedra de Cine

Avilés y la Universidá d’Uviéu roblen el conveniu pa crear la Cátedra de Cine
24 16:37 2020 Imprimir

L’alcaldesa d’Avilés, Mariví Monteserín, y el rector de la Universidá d’Uviéu, Santiago García Granda, roblaron esti mediudía’l conveniu institucional pol que se crea la Cátedra de Cine, un nuevu estudiu d’estensión universitaria que va convertir a Avilés nel epicentru de la investigación fílmica n’Asturies.

“Avilés foi siempres una ciudá adelantrada por otorgar a la cultura un papel activu nel so progresu. Nestos momentos, nel alborecer de la revolución científicu tecnolóxica, tenemos de dar un nuevu pasu y avanzar escontra una concepción activa de la cultura”, señaló Monteserín, quien añedió que “esta Cátedra va dexanos avanzar nesa dirección, abriendo una reflexón permanente en redol a una de les artes con mayor incidencia na sociedá, y motivando nueves moliciones nesti xéneru”.

L’alcuerdu robláu, con una duración inicial de cuatro años, sienta les bases de la collaboración ente dambes instituciones pa poner en marcha esta Cátedra, que naz coles mires de favorecer el desenvolvimientu de la creación audiovisual n’Asturies y de fomentar la investigación en redol al cine y la praxis fílmica, tanto dientro como fuera del Principáu.

Asina mesmo, el conveniu recueye’l compromisu de cooperación ente la Cátedra de Cine y l’Avilés Acción Film Festival, coles mires de sumar esfuerzos nos oxetivos marcaos pol testu del alcuerdu:

  • Fomentar l’estudiu y el desenvolvimientu d’una corriente crítica y proactiva de la investigación fílmica dende’l puntu de vista epistemolóxicu, metodolóxicu y didácticu por aciu la organización de congresos, simposios y ciclos de conferencies destinaos a xenerar conteníos teóricos y prácticos dende perspectives innovadores.
  • Establecer sinergias y relaciones de collaboración dientro y fora de la Universidá y dende distintos ámbitos d’estudiu con otres instituciones, orquestes, festivales de cine y música y conservatorios.
  • Promocionar alcuentros nacionales ya internacionales con espertos na materia pa crear, al mediu plazu, grupos de trabayu qu’espublicen y sopelexen la industria cinematográfico.

La dirección va recayer en Magdalena Cueto, catedrática d’Analís Testual y directora de la área d’actividaes docentes y culturales del Vicerrectorado d’Estensión Universitaria de la Universidá d’Uviéu. Pela so parte, la subdireición va ser exercida por José Ángel Lázaro, profesor de Cine na Universidá Carlos III de Madrid y actual programador del Avilés Acción Film Festival.

La Cátedra va programar y va llevar a cabo curso especializaos, seminarios, llecciones/conferencies maestres, aules formatives (cursos cuatrimestrales), según alcuentros y talleres en collaboración con distintes instituciones y entidaes del sector audiovisual.

L’alcuerdu inclúi tamién la creación d’una Comisión de Siguimientu que se va axuntar a lo menos una vegada al añu y va tar formada por trés representantes del Conceyu d’Avilés (la conceyala de Cultura y dos técnicos/as municipales), y otros trés de la Universidá d’Uviéu (el rector, y tanto la dirección como la subdireición de la Cátedra). cTocantes a la dotación económica d’esta Cátedra de Cine, el Conceyu d’Avilés comprometer a realizar l’aportación de 10.000 euros pal exerciciu 2020, ente que p’años socesivos les cantidaes van determinase por aciu adendas al conveniu.

Pela so parte, la Universidá d’Uviéu comprometese a la puesta a disposición de personal, medios, documentación ya instalaciones que puedan ser necesaries pal so desenvolvimientu. El Centru de Servicios Universitarios d’Avilés va ser la see principal d’esta nueva Cátedra de Cine.

  Categories: