Avilés va ser la capital asturiana del Día Internacional de la Muyer

by redacción asturnews | marzo 6, 2017 12:21 pm

Avilés va ser la capital de los actos conmemorativos del Día Internacional de la Muyer, que se celebra cada 8 de marzu, con un programa d’actividaes qu’inclúi teatru, poesía, música y coloquios, ente los díes 4 y 21 d’esti mes, según informó la concejala d’Igualdá, Raquel Ruiz.

La plaza d’España foi puntu de partida y de finalización de la IV Carrera ‘Avilés pola Igualdá’, que tuvo llugar el sábadu, 4 de marzu, dende les 11 hores, y col qu’entamó esta programación. Tratose d’un eventu social y deportivo non competitivu, entamáu cola collaboración de la Fundación Municipal de Deportes y los clubes Atlética Avilesina y Avilés Atletismu.

Esti próximu miércoles, 8 de marzu, tres la celebración del actu institucional que’l Principáu entama na Casa de Cultura, el Teatru Palacio Valdés va acoyer l’actu central del Día Internacional de la Muyer n’Avilés, cola representación de la obra de teatru ‘Branu n’avientu’, de Carolina África, per parte de la compañía La Belloch Teatru. Va Ser a partir de les 20 hores y, primeramente al empiezu de la obra, va dase llectura al Manifiestu’l Conseyu Municipal de la Muyer.

El próximu 10 de marzu, a partir de les 18.30 hores, el Centru de Servicios Universitarios va allugar una mesa redonda titulada ‘Balance de los 10 años de la Llei d’Igualdá’, que va cuntar cola participación de cuatro de los sos ponentes, en concretu Margarita Uría, María Pigem, Susana Camareru y la exdiputada nel Congresu y güei alcaldesa d’Avilés, Mariví Monteserín. Primeramente, a les 17.30 hores va tener llugar l’apertura institucional del actu y, a les 18.00 hores, la presentación d’un vídeu sobre igualdá ellaboráu pol grupu de participación del Conseyu d’Infancia y Adolescencia d’Avilés.

El 18 de marzu, a les 19 hores va empezar na Casa de Cultura la charra-coloquiu ‘Avilés fai Rap Positivu: Respétame, respétate! pola igualdá de xéneru’, que va cuntar cola actuación del raperu El Chojín. El 21 de marzu, el Centru de Servicios Universitarios va acoyer la conmemoración del Día Mundial de la Poesía, con un actu sol títulu ‘Delles nietes de Gloria Fuertes: coordinaes, estétiques y voces de la nueva poesía española’. Nél van participar la poeta Alba González Sanz y un grupu d’alumnos de bachilleratu del IES númberu 5 d’Avilés.

Amás del programa municipal pal Día Internacional de la Muyer, la ciudá va acoyer nesta ocasión l’actu institucional entamáu cada añu pol Gobiernu rexonal. La Casa Municipal de Cultura ye l’allugamientu escoyíu pa una ceremonia que va tener llugar a partir de les 17.30 hores del mesmu día 8 de marzu, cola presencia d’autoridaes del Executivu autonómicu y del Institutu Asturianu de la Muyer.

Source URL: http://asturnews.com/aviles-va-ser-la-capital-asturiana-del-dia-internacional-de-la-muyer/