Avilés ufre un serviciu de sofitu psicolóxicu pa remanar les dificultaes de convivencia

El Conceyu d’Avilés sumase al Proyectu Transit empobináu a adolescentes y les sos families y ufre un serviciu de sofitu psicolóxicu pa remanar les dificultaes de convivencia derivaes pol confinamientu.

Dende’l Conceyu d’Avilés impúlsase’l Proyectu Transit, un serviciu gratuitu de sofitu psicolóxicu pa families y adolescentes d’Avilés, consciente de qu’énte la crisis sanitaria ensin precedentes que tamos careciendo y les sos consecuencies, tamos viviendo xuna situación nueva y complexa na que se dan munchos factores de estrés rellacionaos col mieu a l’andada, problemes económicos, situación llaboral, incertidume escolar, necesidaes de cuidos, etc.

El Proyectu Transit ta financiáu pol Conceyu d’Avilés y desenvueltu pola asociación Ye too Ponese.  L’atención va ser personalizada y va llevase a cabu peles víes escoyíes poles families que puede ser per teléfonu, chat, email o videollamada. P’aportar a esti nuevu serviciu de sofitu, les families tienen de responder  a un cuestionariu disponible na web de Ye too Ponese al que puede aportase directamente nesti link:  http://www.yetooponese.net/apoyo-familias/

Según esplicó la conceyala d’Educación, Nuria Delmiro, “por cuenta de la crisis sanitaria y el confinamientu deriváu de la declaración del Estáu d’Alarma, permanecemos en casa mientres muncho tiempu coles mesmes persones onde les formes habituales qu’utilizamos pa remanar les nueses emociones y los vezos que nos faen sentir bien, munches vegaes nun son posibles”.

Pa sofitar nos retos de convivencia qu’esta situación pue suponer, ponse en marcha esti serviciu pa remanar les dificultaes de convivencia, tantu pa les persones adolescentes, como pa les persones adultes con adolescentes al so cuidu. Van Ser atendíos por profesionales de la psicoloxía con formación en terapia y mediación familiar y esperiencia nel trabayu con adolescentes.