Avilés rinde homenaxe a los Hermanos Castro con una esposición sobro les sos trayectories deportives

by redacción asturnews | julio 11, 2018 6:17 pm

Avilés rinde homenaxe a los Hermanos Castro con una esposición sobro les sos trayectories deportives, previa al II Alcuentru de Peñes Sportinguistes, y compuesta por trofeos, camisetes, fotografíes y otros oxetos personales d’Enrique Castro Quini y Jesús Castro. 

La esposición “Hermanos Castro” foi presentada a los medios de comunicación esta selmana pola conceyala de Deportes del Conceyu d’Avilés, Ana Hevia y va poder visitase na Casa Municipal de Cultura con entrada gratuita dende esti miércoles 11 hasta’l 27 de xunetu. Na presentación tamién participaron el vicepresidente del Real Sporting de Xixón, Javier Martínez y el presidente de la Federación de Peñes Sportinguistes, Jorge Guerrero.

L’amuesa ta dedicada a Enrique Castro Quini y al so hermanu pequenu Jesús Castro, dos futbolistes que vivieron bona parte de la so vida n’Avilés y empezaron la so carrera futbolística nel C.D Ensidesa de Llaranes. Dambos fueron galardonaos col Premiu Especial na Gala del Deporte Avilesino, la mayor reconocencia deportiva a nivel municipal.

Los y les visitantes van poder contemplar numberosos oxetos personales de los hermanos Castro: fotografíes, cuadros, camisetes propies y dedicaes por otros grandes xugadores de la lliga española como David Villa, Xavi, Samuel Eto´o, Gerard Piqué… Tamién s’esponen trofeos, incluyíos los siete Pichichi de Quini al máximu goliador de la lliga española, el xugador que más vegaes consiguió esti galardón.

Esta esposición sirve de preámbulu del II Alcuentru Añal de Peñes Sportinguistes que nesta ocasión celebrase n’Avilés, el 21 de xunetu. Un alcuentru multitudinariu al que van allegar aficionaos de toa Asturies que va sirvir pa homenaxar a los hermanos Castro, que les sos trayectories tán íntimamente amestaes al Sporting de Xixón. Tratar d’una fecha bien especial debíu al recién fallecimientu de Quini y al 25 aniversariu del fallecimientu de Jesús Castro.

El día del alcuentru celebrarase l’actu oficial nel que’l Complexu Deportivu La Toba va pasar a sumar el nome de “Hermanos Castro” y los campos de fútbol I ya II van empezar a denominase Enrique Castro Quini y Jesús Castro, respectivamente.

Jesús Castro desenvolvió tola so carrera deportiva como profesional nel Real Sporting de Xixón. En total xugó 18 temporaes (14 en Primer División), dende l’añu 1967 al 1985. Apostó 417 partíos como porteru y consiguió dos ascensos a la máxima categoría. Foi convocáu cola selección española p’apostar los Xuegos Olímpicos de Múnich 1972. Finó a los 42 años na sablera de Pechón (Cantabria) en salvando la vida de dos neños ingleses y el so padre que se taben afogando nel mar.

Enrique Castro Quini foi unu de los meyores delanteros del fútbol español. Militó mientres 15 temporaes nel Real Sporting de Xixón y cuatro nel F.C. Barcelona nes décades de los 70 y 80. Consiguió 7 “pichichis” (cinco en Primer División y dos más en Segunda), xugó 541 partíos y anotó 281 goles. Foi internacional en 37 ocasiones cola Selección Española y apostó los Mundiales d’Arxentina 78, España 82 y l’Eurocopa d’Italia 80. Tres la so retirada siguió bien amestáu al Sporting, onde exerció como delegáu de campu y responsable de relaciones institucionales del club. Tres el so recién fallecimientu l’estadiu del club xixonés pasó a llamase El Molinón Enrique Castro Quini.

Source URL: http://asturnews.com/aviles-rinde-homenaxe-a-los-hermanos-castro-con-una-esposicion-sobro-les-sos-trayectories-deportives/