Avilés refuerza la visibilidá del comerciu con dos vídeos promocionales

El Conceyu refuerza la visibilidá del comerciu avilesín con dos vídeos promocionales en collaboración col grupu de “De compres per Avilés”, qu’axunta a un centenar de comerciantes locales. La conceyalía de Comerciu y Turismu encargó los trabayos al estudiu de fotografía avilesín Always Photography y pueden vese yá na canal de Youtube del Conceyu.

La conceyalía de Comerciu y Turismu sigue poniendo en marcha iniciatives para visibilizar el comerciu local con vistes a favorecer la recuperación del sector lo antes posible. Con esti oxetivu, nes últimes selmanes s’ellaboraron y publicaron nes redes sociales dos vídeos promocionales:  unu enfocáu nos comercios locales y otru n’agradecimientu al compromisu de la ciudadanía avilesina na llucha contra’l Covid-19. Dambos fueron realizaos pol estudiu de fotografía avilesín Always Photograpy.

Según esplica la conceyala Raquel Ruiz, “tratase de dos pieces de dos minutos y mediu, pensaes pal so espardimientu en redes sociales, que busquen visibilizar el sector y promover un mayor dinamismu na ciudá, animando a la ciudadanía a cuntar col comerciu de proximidá nesta nueva etapa”.

El primeru de los vídeos cuntó cola collaboración del grupu “De compres per Avilés” qu’axunta a un centenar de comerciantes d’Avilés. Nesta pieza, distintos comerciantes avilesinos ponen en valor la variedá y calidá de les tiendes y establecimientos d’hostelería d’Avilés y resalten la vitalidá qu’apurren a la ciudá.

Nel segundu de los trabayos, amuésase Avilés mientres los díes de confinamientu al traviés d’imaxes de les cais vacíes de la ciudá y de les nueves rutines de solidaridá y convivencia que se crearon nes últimes selmanes, como los aplausos nes ventanes o los mensaxes d’ánimu amosaos nos balcones.