Avilés programó 139 actividaes culturales mientres los 99 díes de confinamientu

by redacción asturnews | julio 2, 2020 12:04 pm

La conceyalía de Cultura d’Avilés programó 139 actividaes mientres los 99 díes del estáu d’alarma. Les distintes propuestes artístiques, destinaes a tolos públicos y con especial relevancia les infantiles, enllargaronse, sumaes, nun total de 319 xornaes.

El trabayu na conceyalía de Cultura d’Avilés caltuvose a plenu rendimientu mientres el confinamientu, con una premisa: ufiertar propuestes culturales de toa índole y para tolos públicos de la ciudá, d’una forma qu’aguiyara la participación y la creatividá, y con una especial relevancia a les infantiles. Asina, programáronse 139 actividaes nos 99 díes que duró l’estáu d’alarma pola pandemia del COVID-19, del 14 de marzu al 21 de xunu. Factoría Sound Acoustic, con 27 conciertos na rede, y Arte pal Confinamientu, con 26 tutoriales, son los que más sumen. Música, teatru, cerámica, cómic, pintura o lliteratura fueron dalgunes de les disciplines que pudieron esfrutar dende Avilés para tol mundu al traviés de les redes sociales.

Dende la Factoría Cultural llegaron les propuestes que más actividaes sumaron. Per un sitiu, los conciertos virtuales de la Factoría Sound Acoustic, 27 recitales de músicos que pasaren estos años pol ciclu Factoría Sound, y Arte pal Confinamientu, con 26 proposiciones nes más variaes disciplines, gracies a la implicación total del profesoráu y el ceadores que collaboren davezu nel centru cultural.

Avilesinos y avilesines, de toles edaes, tuvieron a la so disposición mientres tolos díes del confinamientu, al traviés de les distintes plataformes qu’ufierta Internet, les redes sociales del Conceyu y la Factoría Cultural, entretenimientu, divulgación, participación, nes más diverses disciplines. Sumaes toes nel tiempu, dan un total de 319 xornaes.

Más información[1]

Endnotes:
  1. Más información: http://aviles.es/web/guest/inicio/-/asset_publisher/iuRYQKs29WiC/content/la-concejalia-de-cultura-de-aviles-programo-139-actividades-durante-los-99-dias-del-estado-de-alarma/12309

Source URL: http://asturnews.com/aviles-programo-139-actividaes-culturales-mientres-los-99-dies-de-confinamientu/