“Avilés en femenín” ufre los llunes d’agostu visites teatralizaes

Depués d’entamar en xunetu, “Avilés en femenín”, propuesta que celebra, esti branu de 2021, la so tercer edición va siguir ufiertándose  los llunes d’agostu a les 19:30 hores con reserves y puntu d’alcuentru na Oficina de Turismu. Esti domingu tamién se celebró la ruta “Muyeres que fixeron hestoria”.

Un añu más la conceyalía de Turismu programó esti domingu primeru d’agostu l’actividá Muyeres que fixeron hestoria, una visita teatralizada na cual dalgunes de les protagonistes d’Avilés en Femenín, les muyeres escritores y artistes que marcaron la vida cultural avilesina, van acompañar a los y les visitantes mientres éstos escuchen el relatu de la mano de la Historiadora del Arte, Patricia Pérez (Cúntame un Cuadru), que va exercer como anfitriona del grupu.

Avilés conviértese asina nun escenariu únicu y nes sos construcciones históriques espérennos muyeres del pasáu como Cristine de Pizan, la primer escritora profesional de la Hestoria. O Isabel Barreto, la primer persona que crució l’Océanu Pacíficu pol hemisferiu sur. Y Olympe de Gouges, autora de la Declaración de derechos de la muyer y la ciudadana.

La presencia de los referentes femeninos nel relatu históricu tradicional relluma pola so ausencia, pero esto nun quier dicir que nun  hubiera muyeres importantes na Hestoria, quier dicir a cencielles, que nun nos falaron d’elles. Pa visibilizar a delles d’eses muyeres nació “Avilés en femenín” una propuesta que celebra, esti branu de 2021, la so tercer edición y que s’ufierta los llunes d’agostu a les 19:30 hores con reserves y puntu d’alcuentru tamién na Oficina de Turismu.