Portada Cooperación Avilés conmemora’l Día Internacional contra la Violencia escontra les Muyeres

Avilés conmemora’l Día Internacional contra la Violencia escontra les Muyeres

by redacción asturnews

Col 24 de payares como xornada central, Avilés conmemora’l Día Internacional contra la Violencia escontra les Muyeres esta selmana, entamando esti miércoles 22 y desenvolviendo un bultable programa d’actividaes hasta’l sábdu 25.

La conceyala d’Igualdá, Raquel Ruiz, presentó hai poco les actividaes que se van desenvolver n’Avilés con motivu del Día Internacional contra la Violencia escontra les Muyeres, que se conmemora’l sábadu, 25 de payares. El Conceyu d’Avilés entama güei un programa d’actividaes que volverán tener como oxetivu principal la reflexón colectiva y la concienciación social contra la violencia de xéneru.

El programa d’actos va aniciase’l miércoles 22, a les 18:30 hores nel Palaciu de Valdecarzana cola presentación de Bones práctiques polos bonos tratos na que van participar el grupu “d’Antenes Informatives” del Serviciu de Mocedá, el proyectu “Educación de Cai” del Conceyu d’Avilés y l’Asociación Social y Cultural Abeyu.

El xueves 23 a les 13 hores va tener llugar nel IES Menéndez Pidal la inauguración de la Esposición de Cartelos sobro la violencia de xéneru realizaos pol alumnáu de Bachilleratu d’Arte del propiu centru. Y el Centru de Servicios Universitarios va acoyer el vienres 24 a les 10.00 hores l’apertura institucional del Día Internacional contra la Violencia escontra les Muyeres que va correr al cargu de la alcaldesa, Mariví Monteserín. Darréu, a les 10.30 hores va tener llugar la conferencia “Valoración médicu-forense de la violencia de xéneru”, impartida por Juan Manuel Cartaxena Pastor, médicu forense, especialista en Medicina Llegal y Forense y profesor de la Universidá Alfonso X El Sabiu.

El vienres 24 a les 12 hores, na plaza d’España, va llevase a cabu xuna concentración silenciosa de condena a la violencia de xéneru, n’alcordanza y solidaridá coles sos víctimes, a la que va siguir la llectura d’un manifiestu redactáu poles asociaciones del Conseyu Municipal de la Muyer.

La IX Marcha Comarcal contra la Violencia de Xéneru va tener llugar el sábadu 25 de payares y anguaño ye Castrillón la encargada d’axuntar a toles persones que quieran formar parte d’esti actu. La marcha, que ta entamada polos conceyos d’Avilés, Castrillón, Corvera, Gozón ya Illas, va arrincar a les 12:00 hores del Parque de la Llibertá de Piedres Blanques y va rematar na Plaza d’Europa.

Ver programa completu

Tamién te podria gustar