Avilés celebra’l Día Internacional de la Ciudá Educadora por partida doble

by redacción asturnews | noviembre 24, 2020 11:57 am

Avilés va celebrar por partida doble’l Día Internacional de la Ciudá Educadora, que se conmemora en tol mundu’l 30 de payares. va facer cumpliendo 20 años como integrante de l’Asociación Internacional de Ciudaes Educadores, entidá que de la mesma conmemora trés décades de vida sol lema “30 años tresformando persones y ciudaes para un mundu meyor”.

El programa d’actividaes diseñáu pa esta doble efeméride da un especial protagonismu al alumnáu de los centros educativos d’Avilés, quien van cavilgar en voz alta sobro los llogros alcanzaos mientres estos 20 años como Ciudá Educadora, y los retos presentes y oportunidaes de futuru que se presenten.

De manera previa a esta xornada, el Plenu Municipal del Conceyu d’Avilés va aprobar el vienres 27 de payares la declaración institucional d’adhesión a la nueva Carta de Ciudaes Educadores.

Yá’l llunes 30 de payares, a les 11 hores, va tener llugar la llectura pública d’un comunicáu institucional per parte de l’alcaldesa d’Avilés, Mariví Monteserín, quien darréu va conectar en directu pa participar nel programa de radio “Diálogo cola alcaldesa”, realizáu por alumnáu del CEIP Virxe de Les Marees. El programa va quedar grabáu y va espublizase al traviés de les redes sociales del Conceyu d’Avilés.

Nesti espaciu, los y les escolares van treslladar a la rexidora mensaxes grabaos en vídeu, con una duración de 30 segundos, treslladaos por alumnáu de distintos centros educativos del conceyu, nos que cavilguen sobro’l contestu educativu del momentu actual, marcáu pola pandemia del COVID-19. Como respuesta, Monteserín va unviar un vídeu común a tolos centros cavilgando sobro lo recoyío, según sobro lo que supon qu’Avilés lleve 20 años siendo xuna Ciudá Educadora.

Mientres la xornada del llunes 30 tamién se va publicar al traviés de les redes sociales municipales el programa radio-visual “Avilés, Ciudá Educadora 20 años: aprendizaxes”. Nél, amás del alumnáu y el profesoráu del CEIP Virxe de Les Marees, van participar la mesma Mariví Monteserín; la concejala d’Educación, Nuria Delmiro; un/a deportista d’élite de la ciudá; según otres persones venceyaes tantu a los mesmos centros como al programa didácticu PAMUA (Patrimoniu Municipal d’Avilés).

Al traviés d’un concursu y en formatu d’humor, Daniel Ortuño, director del programa, va esbillar coles y los participantes qué saben sobro lo que supon xuna Ciudá Educadora y cuál ye la responsabilidá de cada persona na construcción d’una urbe integradora, atopadiza ya innovadora.

Los perfiles del Conceyu d’Avilés en redes sociales tamién van sopelexar un vídeu tituláu “Avilés Ciudá Educadora: 30 aprendizaxes”. Nél, alumnáu de distintos centros educativos va numberar xuna trentena de llecciones aprendíes pol conceyu nestes dos décades:

La Ciudá Educadora ye un llaboratoriu vivu d’aprendizaxes.
La Ciudá Educadora ufierta numberoses oportunidaes educatives a tola ciudadanía.
Na Ciudá Educadora, la educación va más allá de la escuela y trescala cais, places y parques.
La Ciudá Educadora fomenta la convivencia, la inclusión, la igualdá na diversidá, la xusticia social, la solidaridá y la paz.
La Ciudá Educadora promueve el desenvolvimientu y empodera a la so ciudadanía.
Na Ciudá Educadora, les persones aprienden a lo llargo de tola vida.
Na Ciudá Educadora, toles persones tienen siempres daqué qu’enseñar y aprender.
La Ciudá Educadora precisa del compromisu de tola comunidá pa educar.
Na Ciudá Educadora, se promueve l’alquisición de conocencies y habilidaes y foméntase l’aprender a ser y a convivir.
La Ciudá Educadora nun dexa a naide tras.
La Ciudá Educadora rique de voluntá y compromisu políticu cola educación.
Na Ciudá Educadora, les persones tán nel centru de l’acción municipal.
Na Ciudá Educadora, la educación ye cosa de toles árees municipales.
La Ciudá Educadora refuerza, visibiliza y evalúa l’impactu educativu de les polítiques municipales.
La Ciudá Educadora ye un proyectu compartíu ente gobiernu local y sociedá civil.
La construcción d’una Ciudá Educadora rique collaboración y trabayu en rede.
La comunicación y l’información son clave na Ciudá Educadora.
La Ciudá Educadora practica la escucha activa.
La Ciudá Educadora fomenta la participación ciudadana.
La Ciudá Educadora forma a una ciudadanía democrática, activa y crítica.
La Ciudá Educadora identifica y da respuesta a los problemes conjuntamente cola ciudadanía.
Na Ciudá Educadora, la utopía trescala’l llabor educativu.
La Ciudá Educadora ye incubadora d’innovación social y educativa.
Ser Ciudá Educadora esixe un proyectu de ciudá compartíu y sosteníu nel tiempu.
La Ciudá Educadora fomenta estilos de vida saludables y sostenibles.
La Ciudá Educadora ye una ciudá humana y atopadiza.
La ciudá educadora refuerza’l sentimientu de pertenencia y los venceyos de comunidá.
Na Ciudá Educadora, la educación tresforma a les persones pa tresformar el mundu.
Les Ciudaes Educadores aprienden unes d’otres.
Más de 500 ciudaes de too el mundu tán comprometíes cola Carta de Ciudaes Educadores.

Estos 30 aprendizaxes van ser sopelexaos de la mesma por aciu la so esposición pública en distintes “mupis” partíos poles cais y places de la ciudá, na selmana ente’l 30 de payares y el 6 d’avientu.

Los distintos conteníos y materiales ellaboraos pa esta doble conmemoración van ser sopelexaos nes redes sociales por aciu la etiqueta #avilesciudadeducadora20años. Ente estos materiales tamién va figurar un vídeu nel qu’alumnáu de distintos centros va dar llectura a la nueva carta de Ciudaes Educadores.

A lo último, los centros educativos van tener a la so disposición materiales ellaboraos pola Asociación Internacional de Ciudaes Educadores por que el alumnáu pueda trabayar y celebrar esta xornada nes sos respectives aules.

Source URL: http://asturnews.com/aviles-celebral-dia-internacional-de-la-ciuda-educadora-por-partida-doble/