Portada Conceyos Avilés celebra la Fiesta de Música con un conciertu de 150 músicos na Casa de Cultura

Avilés celebra la Fiesta de Música con un conciertu de 150 músicos na Casa de Cultura

by redacción asturnews

Con 150 músicos xuntos nun mesmu escenariu ye como va celebrar Avilés, per quinta ocasión y esti martes, la Fiesta de la Música, impulsada pol Conceyu d’Avilés y el Conservatorio Municipal Profesional “Julián Orbón”.

Va ser esti martes, 21 de xunu, na Casa Municipal de Cultura con un recital, que va empezar a les 20 hores y va cuntar cola participación de vocalistes ya instrumentistes de 8 formaciones instrumentales y corales avilesines. Va ser un conciertu gratuitu, con entrada llibre hasta completar aforu.

A la Banda Sinfónica, la Orquesta Sinfónica y el Coru del Conservatorio van xunise instrumentistes y coralistes de la Banda de Música d’Avilés, el Coru Amigos de Sabugo, la Coral  Polifónica del Centru Asturianu, el Coru Contracanto, el Coru Amigos de Miranda. Xuntos van formar el martes una gran orquesta y un inmensu coru que van interpretar un repertoriu popular y, en gran midida, conocíu pol públicu.

Xuacu Llaneza, Iván Cuervu y Marcos Malnero van ser el directores del conciertu nel so parte instrumental. Les voces de les cinco agrupaciones corales participantes van tar dirixíes por Isabel Baigorri (alumnáu del Coru d’Enseñances Profesionales del Conservatorio), Fran Carreño (Coru Contracanto), Soledad Rodríguez  (Coru Amigos de Miranda), José Manuel  Santu Medero (Coral Polifónica del Centru Asturianu) y Elena Baigorri (Coru Amigos de Sabugo).

Na actuación d’esti brillante conxuntu de talentu musical avilesín van sonar pieces icóniques de la música (pasudobles, zarzueles y música  de cine), xuntu con dalgún conocíu coru d’ópera, nun repertoriu preparáu conjuntamente por toles agrupaciones participantes. A elles sumaráse profesoráu y antiguu alumnáu del Conservatorio Municipal en calidá de collaboradores.

Va ser la quinta vegada  na qu’Avilés se sume a la celebración de la Fiesta de la Música, cita añal que, coincidiendo col solsticiu de branu, tien llugar en numberoses ciudaes de tol planeta. Dende la so creación en Francia nel añu 1982, creció hasta convertise nuna de les mayores manifestaciones culturales a nivel mundial, celebrándose na última edición nun total de 120 países.

Tamién te podria gustar