Portada Educación Avilés celebra “La ciencia que nos curia”, un alcuentru de divulgación científica

Avilés celebra “La ciencia que nos curia”, un alcuentru de divulgación científica

by redacción asturnews

L’alcuentru de divulgación científica “La ciencia que nos curia” que va desenvolvese esti xueves ye una de les primeres actividaes del proyectu AvilésConCiencia y va ufiertar soluciones innovadores de base científica rellacionaes cola salú, el cambéu demográficu y el bienestar.

“La Ciencia que nos curia” ye’l títulu del primer alcuentru del ciclu de divulgación científica “Ciencia con palombines”, desenvueltu pol Parque Científicu y Tecnolóxicu Avilés Isla de la Innovación dientro del Programa AvilésConCiencia. Va Tener llugar esti xueves 20 de setiembre, a partir de les 18:30 hores, nel Cine del Centru Niemeyer. Primeramente, la so celebración taba prevista na torre mirador de la cortil cultural, pero l’alta demanda d’asistentes fixo necesariu’l cambéu a unu allugamientu con mayor aforu.

Nesta sesión, de calter gratuitu, un grupu d’espertos con perfil investigador y científicu va afrontar el tópicu “Salú, cambéu demográficu y bienestar”, presentando soluciones innovadores de base científica en respuesta a estos retos, xenerando un espaciu informal y abierto d’alderique ya intercambiu d’idees,  coles mires d’averar la ciencia a la ciudadanía.

Xuntu con Amador Menéndez, investigador del ITMA consideráu como unu de los meyores divulgadores científicos del país, van participar Manuel Vilches, divulgador del Institutu de Medicina Oncolóxica y Molecular d’Asturies (IMOMA), y Gabriel Álvarez como Catuxa Prado, personal científico de la empresa asturiana Healthsens, centrada nel ámbitu de la biotecnoloxía y la nanotecnología.

“Ciencia con palombines” ye un ciclu d’alcuentros para xenerar l’intercambiu d’idees ente persones de perfil investigador, tecnólogu y científicu, con una audiencia heteroxénea, namá caracterizada por nun formar parte de la comunidá científica. L’oxetivu d’esta iniciativa ye encetar, por aciu propuestes innovadores y respuestes científiques, cada unu de los retos identificaos na estratexa Horizonte 2020 de la Comisión Europea, que’l so principal oxetivu ye asegurar la competitividá global d’Europa.

Nel alcuentru van tratase los siguientes asuntos:

Salú, cambéu demográficu y bienestar
Reto de la Bioeconomía europea: seguridá alimentaria, agricultura sostenible, investigación marina y marítima y economía de base biolóxica Enerxía segura,
llimpia y eficiente
Tresporte intelixente, sostenible ya integráu
Acción pol clima, eficiencia de recursos y materies primes
Europa nun mundu cambiante: Sociedaes inclusives, innovadores y segures

El proyectu AvilésConCiencia, nel que s’inclúi’l programa de encuentro “Ciencia con palombines”, ye un conxuntu d’acciones pal espardimientu a la ciudadanía de los proyectos científicos d’I+D+I que s’investiguen n’Avilés, pa la xeneración d’espacios pa la tecnoloxía, y pal fomentu ente mozos estudiantes de vocaciones STEAM, acrónimo n’inglés de Ciencia, Tecnoloxía, Inxeniería, Arte y Matemátiques.

 

Tamién te podria gustar