Avilés anueva la distinción de “Ciudá de la Ciencia y l’Innovación”

by redacción asturnews | septiembre 25, 2018 9:06 am

El Ministeriu de Ciencia, Innovación y Universidaes reafita  la distinción de “Ciudá de la Ciencia y l’Innovación”, una reconocencia otorgada en 2010 y revalidda en 2014. Les 16 ciudaes que cunten con esta distinción integren la Rede INNPULSO.

El Ministeriu de Ciencia, Innovación y Universidaes anovó esta selmana pasada la distinción de “Ciudá de la Ciencia y l’Innovación” a Avilés, xuntu con otres 15 ciudaes de too el país. Tratase d’una reconocencia otorgada en 2010 y anováu en 2014, que supón la continuidá d’Avilés na Rede de “Ciudaes de la Ciencia y l’Innovación” de l’Asociación Rede INNPULSO (ARINN).

L’alcaldesa Mariví Monteserín amosó’l so prestu pola decisión del Ministeriu de conceder una vegada más a Avilés la distinción de “Ciudá de la Ciencia y l’Innovación”: “Supon la reconocencia de los importantes proyectos que güei Avilés impulsa na so condición de ciudá comprometida cola investigación, la innovación y la conocencia. Integremos esi compromisu como un factor determinante del tresformamientu de la ciudá en tolos ámbitos: nel social, nel económicu y nel urbanu”.

Monteserín recuerda que dende la primer concesión d’esta distinción en 2010 “fueron munches les acciones entamaes con importantes resultaos pa la ciudá, siendo merecedores de grandes reconocencies dientro y fora del nuesu país”. Ente estes iniciatives destaquen les desenvueltes n’ámbitos como l’alministración electrónica, l’aforru enerxético, la promoción económica, la rexeneración medioambiental, la contratación pública con criterios sociales o les ayudes sociales de garantía enerxética.

Na actualidá, recuerda l’alcaldesa, Avilés avanza na definición d’una innovadora Smart City que, al traviés d’un urbanismu intelixente, va ufiertar nuevos servicios a la ciudadanía. Promoción Social, Educación, Cultura o Emprendimiento son dalgunes de les árees nes que’l Conceyu d’Avilés va siguir trabayando pa caltener a la ciudá na vanguardia de la ciencia y l’innovación.

La distinción “Ciudá de la Ciencia y l’Innovación” foi creada en 2010 cola cuenta de reconocer a les ciudaes que sofiten a la innovación nos sos territorios, definiendo polítiques, potenciando estructures, instituciones y empreses locales con fuerte componente científicu, tecnolóxicu ya innovador. Esta reconocencia ye anovable por un periodu de trés años siempres que’l conceyu distinguíu caltenga’l cumplimientu de les condiciones y requisitos que dieron llugar a la so concesión, daqué que se cumple nel casu d’Avilés.

Source URL: http://asturnews.com/aviles-anueva-la-distincion-de-ciuda-de-la-ciencia-y-linnovacion/