Portada Comunicación Avilés acueye l’I Alcuentru Européu de Conseyos de Participación Infantil y Adolescente

Avilés acueye l’I Alcuentru Européu de Conseyos de Participación Infantil y Adolescente

by redacción asturnews

Menores d’ente 14 y 17 años van representar a conseyos locales y rexonales de distintos llugares d’Asturies, España y otros países europeos nel Alcuentru Européu de Conseyos Locales y Rexonales de Participación Infantil y Adolescente, que va tener llugar del 1 al 5 de marzu n’Avilés.

La conceyala de Mocedá, Raquel Ruiz, presentó esti llunes el I Alcuentru Européu de Conseyos Locales y Rexonales de Participación Infantil y Adolescente, que va tener llugar del 1 al 5 de marzu n’Avilés. Asistieron tamién a la presentación la directora xeneral de Participación del Gobiernu d’Asturies, Melania Álvarez; el coordinador del Observatoriu de la Infancia y l’Adolescencia d’Asturies, Carlos Becedoniz; y la presidenta de UNICEF Asturies, María José Plateru.

L’alcuentru va desenvolvese nes instalaciones de la Residencia d’Usos Múltiples del Edificiu Fueru, cola participación de moces y mozos d’edaes ente los 14 y los 17 años. Van representar a conseyos locales y rexonales de Participación Infantil y Adolescente d’Asturies, d’otres comunidaes autónomes y d’otros puntos de distintos países de la Unión Europea.

Demientres esti eventu, los mozos participantes van intercambiar bones práctiques llevaes a cabu nes sos distintes localidaes d’orixe, nel exerciciu del derechu de los mozos y moces a ser escuchaos y a participar nes sos comunidaes. Van Afondar nes claves del so ésitu y van buscar práctiques meyores y más eficaces.

Tamién van ellaborase un manifiestu coles sos opiniones, reflexones y propuestes, que va ser presentáu demientres la xornada de clausura a distintes autoridaes, ente les que ta previstu figuren eurodiputaos y eurodiputaes. Esti manifiestu y les sos conclusiones van tener relación colos oxetivos de l’Axenda 2030 de Desenvolvimientu Sostenible de l’Asamblea Xeneral de la ONU.

Les mañanes de les xornaes centrales del Alcuentru van dedicase a trabayar en redol a estos aspeutos d’interés sobro la participación de la infancia y l’adolescencia. Mientres les tardes van llevar a cabo actividad culturales (con visites tanto a la mesma ciudá d’Avilés como a otros llugares d’Asturies), d’ociu y artístiques, coles mires de facilitar la espresión y el divertimento de los participantes. Pela so parte, el xueves 1 va celebrase xuna ceremonia d’entamu,  ente que’l llunes 4 va tener llugar la ceremonia de clausura, cola llectura’l manifiestu y conclusiones.

L’alcuentru ta entamáu pol Conceyu d’Avilés, la Conseyería de Servicios y Derechos Sociales del Principáu d’Asturies y UNICEF Asturies. L’asociación asturiana Los Glayos va ser la encargada de la dinamización d’estes xornaes. L’idioma de comunicación de los participantes nel alcuentru va ser l’inglés.

Ta confirmada la participación d’un total de 53 menores, integrantes de conseyos de participación infantil y adolescente de los siguientes conceyos:

Asturies (15 conceyos, 24 representantes): Llaviana, Nava, Bimenes, Belmonte, Llanera, Xixón, Candamo/Candamu, Castrillón, Noreña, Uviéu, Parres, Salas, Colunga, Villaviciosa y Avilés.

Otros puntos d’España (9 conceyos, 18 representantes): Castrelo de Miño (Ourense), Vitoria-Gasteiz, Barbate (Cádiz), Mollerussa (Lleida), Alovera (Guadalaxara), Santander, Calatayud (Zaragoza), Carbajosa de la Sagrada (Salamanca), y Alcobendas (Madrid).

Europa (11 representantes): República Checa, Alemaña, Eslovenia y Bielorrusia, amás un representante de Eurochild (órganu d’Infancia a nivel européu).

Xuntu colos menores van asistir 14 adultos acompañantes y 5 monitores de l’Asociación Los Glayos. Les persones adultes van participar na mañana del vienres en xuntes y sesiones de trabayu específiques pa intercambiar opiniones, métodos, esperiencies y estratexes nel ámbitu de la participación infantil y adolescente. Sobro esta xornada técnica va informase más palantre.

Más información

Tamién te podria gustar