Portada Sociedá Avilés acoyó’l I Alcuentru Européu de Conseyos de Participación Infantil y Adolescente

Avilés acoyó’l I Alcuentru Européu de Conseyos de Participación Infantil y Adolescente

by redacción asturnews

El I Alcuentru Européu de Conseyos Locales y Rexonales de Participación Infantil y Adolescente tuvo llugar del 1 al 5 de marzu n’Avilés nes instalaciones de la Residencia d’Usos Múltiples del Edificiu Fueru, cola participación de moces y mozos d’edaes entendíes ente los 14 y los 17 años.

Estos mozos y moces representaron a conseyos locales y rexonales de Participación Infantil y Adolescente d’Asturies, d’otres comunidaes autónomes y d’otros puntos de distintos países de la Unión Europea. Mientres esti eventu, los mozos participantes intercambiaron bones práctiques llevaes a cabu nes sos distintes localidaes d’orixe, nel exerciciu del derechu de los mozos y moces a ser escuchaos y a participar nes sos comunidaes. Afondaron nes claves del so ésitu y buscaron práctiques meyores y más eficaces.

Tamién ellaboraron un documentu coles sos opiniones, reflexones y propuestes, que foi presentáu mientres la xornada de clausura a distintes autoridaes. Esti manifiestu y les sos conclusiones guarden relación colos oxetivos de l’Axenda 2030 de Desenvolvimientu Sostenible de l’Asamblea Xeneral de la ONU.

Les mañanes de les xornaes centrales del Alcuentru dedicaronse a trabayar en redol a estos aspeutos d’interés sobro la participación de la infancia y l’adolescencia. Mientres les tardes lleváronse a cabo actividaes culturales (con visites tanto a la mesma ciudá d’Avilés como a otros llugares d’Asturies), d’ociu y artístiques, coles mires de facilitar la espresión y el divertimento de los participantes. El domingu 4 tuvo llugar la ceremonia de clausura, cola llectura’l manifiestu y conclusiones.

L’alcuentru tuvo entamáu pol Conceyu d’Avilés, la Conseyería de Servicios y Derechos Sociales del Principáu d’Asturies y UNICEF Asturies. L’asociación asturiana Los Glayus foi la encargada de la dinamización d’estes xornaes. L’idioma de comunicación de los participantes nel alcuentru foi l’inglés.

Conclusiones del I Alcuentru Européu de Grupos de Participación Infantil y Adolescente

Tamién te podria gustar