Atopada una buelga de Leonardo Da Vinci n’unu de los sos bocetos

Atopada una buelga de Leonardo Da Vinci n’unu de los sos bocetos
05 febreru 10:04 2019 Imprimir

Les buelgues dactilares Leonardo Da Vinci, concretamente la del so matapioyos izquierdu, fueron atopaes nun pervalible documentu, calteníu mientres tou esti tiempu nel castiellu de Windsor. Trátase nada menos que d’un dibuxu del sistema cardiovascular y los órganos internos que’l xeniu realizó en 1509.

Alan Donnithorne, antiguu xefe de Caltenimientu de la institución, foi quien afayó la buelga. L’investigador ta convencíu de que l’italianu suxetó’l dibuxu colos sos deos llenos de tinta. Nun queda claru si trátase o non d’un despiste, anque los espertos creen que podría faelo de forma apostada.

Magar lo interesao del descubrimientu, quepe dicir que nun ye la primer vegada que s’atopen les marques de los deos del artista en delles de les sos obres. Sicasí, esta ye la vegada na que les sos buelgues queden más clares. Asina lo asegura Martin Clayton, de la Royal Collection Trust, al diariu británicu The Guardian: “Esto ye lo más barganal que vamos tar nunca de Leonardo, ver la so buelga de forma tan clara. Ye tan clara que casi paez que foi fecha de forma apostada”

Esti y otros afayos más fueron arrexuntaos nun llibru, del que la Royal Collection Trust dio más detalles nes sos redes sociales. “Detalles ocultos en dibuxos de Leonardo Da Vinci son revelaos nel nuesu nuevu llibru: ‘Leonardo da Vinci: una mirada más cercana’ que va ser publicáu esti vienres. Esta imaxe amuesa la so buelga impresa n’una tinta del mesmu color acoloratáu que’l restu del dibuxu”

Tan peculiar volume sal a la lluz coincidiendo col 500 aniversariu de la muerte de Leonardo. Un fondu analís que tamién trata les técniques de dibuxu del italianu.

  Categories: