Atención a les Persones camuda les subvenciones n’Uviéu pa ser abiertes

by redacción asturnews | enero 3, 2018 6:43 pm

El Plan estratéxicu de Subvenciones puestu en marcha na conceyalía d’Atención a les Persones d’Uviéu amenorgó en solo un añu más de la metá de les subvenciones sociales nominatives, esto ye, aquelles que s’otorguen directamente y ensin concurrencia.

Desque la iniciativa se punxera en marcha pel branu de 2016 les socesives convocatories de la conceyalía d’Atención a les Persones, que dirixe Marisa Ponga, apostaron pola publicidá y la llibre concurrencia. Asina, les subvenciones nominatives amenorgaron dende les 42 qu’había cuando s’ellaboró’l Plan a les 19 que figuren nel presupuestu de 2018.

“Había una alvertencia de la Sindicatura de Cuentes al Conceyu diciéndonos abusar de l’ayudes directes y teníamos que pone-y remediu”, esplica Marisa Ponga. “Creo que llogremos un sistema más xustu y democráticu que dexa a tol mundu optar a les distintes llínees ya inclusive recuperar proyectos bien interesantes y que perdieren la subvención nominal”, conclúi la responsable d’Atención a les Persones quien aprovechó la ocasión pa “estimar a toles organizaciones y entidaes que trabayen son Servicios Sociales l’esfuerzu d’anguaño p’afaese al nuevu sistema”.

Conforme a les previsiones del Plan, habilitóse una convocatoria tresañal pa financiar proyectos que riquen d’una mayor estabilidá. Per esta vía concediéronse subvenciones a los proyectos d’un total de 22 entidaes. Ente ellos había proyectos que perdieren la subvención nominativa pero que, pol so induldable interés, pudieron ser calteníos, según otros proyectos nuevos qu’al traviés d’esta convocatoria atoparon un calce de financiamientu estable. El volume total de financiamientu de la convocatoria xubió a 214.610,57€ añales pa un periodu de 3 años.

Per otra parte, caltuviéronse les convocatories pa proyectos de duración añal, aumentando la dotación económica hasta un total de 128.000,00€, y los relativos a Cooperación  al Desenvolvimientu, qu’en 2017 cuntó con una dotación económica de 532.350,00€. Na actualidá ta en trámite xuna convocatoria d’ayudes pa families con menores en riesgu de probeza con una dotación inicial de 536.900,00€.

“La puesta en marcha del plan de subvenciones supunxo un mayor rigor na concesión porque s’afitaron criterios claros y oxetivos. Tou ye más tresparente”, remarca Ponga. Amás tamién aprofia l’esfuerzu realizáu pa simplificar la tramitación de les ayudes y faelo íntegramente por procedimientu electrónicu.

 

Source URL: http://asturnews.com/atencion-a-les-persones-camuda-les-subvenciones-nuvieu-pa-ser-abiertes/