Portada Escéniques Atayen l’actuación de Jorge Cremades en Xixón polos sos tuits y vídeos machistes

Atayen l’actuación de Jorge Cremades en Xixón polos sos tuits y vídeos machistes

by redacción asturnews

El Principáu decide suspender el show del cómicu alicantín Jorge Cremades, que tenía previstu actuar el 18 de febreru na Llaboral, polos sos tuits y vídeos machistes.

Los siguidores de Jorge Cremades van quedar ensin velu en Xixón dempués de que Llaboral Ciudá de la Cultura decidiera ayeri suspender l’espectáculu de monólogo ‘Te odio, pero como amigu’ que l’humorista alicantín tenía previstu ufiertar el 18 de febreru. Y eso, tres les protestes d’organizaciones como l’Asociación de Muyeres Separaes y Divorciaes d’Asturies, que la so presidenta, Jessica Castañu, se congratulaba pola noticia: «Falamos col Institutu Asturianu de la Muyer y dende el primer momentu dionos la razón. Nun ye una cuestión de censura. Ye una cuestión d’ética y de coherencia coles polítiques d’igualdá y los mensaxes que s’enseñen en colexos ya institutos».

L’asociación, que recordaba que la programación del teatru de la Llaboral depende de Recrea y, por tanto, del Principáu, condergara declaraciones como esa na que’l cómicu aseguraba que «hai más violaciones a homes qu’a muyeres y de eso nun se fala», amás de los sos «vídeos y tuits manifiestamente machistes como nel que se ve cómo dellos amigos se rifen a una moza borracha». Y ayeri fueron los responsables de Llaboral quien esplicaben na so web que «la dimensión pública qu’adquirió esti espectáculu» provocó que decidan suspendelu «al considerar que nun s’afai a la llínea de programación artística que se desenvuelve nel centru cultural».

Tamién te podria gustar