Portada Escéniques Atayáu l’estrenu de “L’Abrazu” pola prohibición n’Avilés d’espectáculos culturales

Atayáu l’estrenu de “L’Abrazu” pola prohibición n’Avilés d’espectáculos culturales

by redacción asturnews

La prórroga decretada pol Gobiernu d’Asturies de les restricciones adicionales nos conceyos como Avilés, en nivel 4+ d’espardimientu de la pandemia del COVID-19, qu’impliquen la prohibición de los espectáculos culturales con públicu, motivó la suspensión del estrenu de la obra teatral “L’Abrazu”, previstu pa esti vienres, 26 de febreru, nel Teatru Palacio Valdés, dientro de la programación de xineru a marzu d’EscenAvilés.

Toes aquelles persones qu’adquirieren entraes pa asistir a esta función empobinada por Magüi Mira, y protagonizada por María Galiana, Emilio Buade y Juan Meseguer, van recibir el reembolsu de les mesmes pol mesmu mediu en que les mercaron.

Les restricciones caltiénense, en principiu, hasta’l 1 de marzu, de tala forma que nun afecta a la representación de “Fortunata y Benitu”, de La Nueva, tamién dientro de la programación trimestral de escenAvilés, que caltien el día y l’hora previstos, el 2 de marzu a les 20.15 hores nel Teatru Palacio Valdés

Les midíes de protección sanitaria motiven, asina mesmu, l’aplazamientu de la representación de “Alcordances”, espectáculu de teatru y maxa dientro de la programación de Teatru Familiar, que se diba a estrenar esta tarde, vienres 19 de febreru, nel auditoriu del Centru Sociocultural de Los Canapés.

Finalmente, la función que protagoniza Adrián Conde va tener llugar el vienres 19 de marzu, a 18.00 hores, anque va perder el so calter d’estrenu.

Tamién te podria gustar