Asur Enol Marqués gana’l I Premiu d’Astrofotografía Cieloastur

Un mozu de 16 años, Asur Enol Marqués, foi la persona que se fizo col I Premiu d’Astrofotografía Cieloastur, organizáu pola Fundación Asturies XXI, con una semeya de la Ría de Villaviciosa na que pue vese la lluna en conxunción con Venus y Xúpiter. La semeya tomóse n’avientu del 2008 y cunta cola peculiaridá de que, según cuenta l’autor, “se fizo cola cámara d’un collaciu nel trescursu d’una escursión pela zona”. Marqués, con esta semeya, llevó un premiu de 1.000 euros.

El xuráu que falló esta edición primera del Cieloastur decantóse pola semeya fecha en territoriu maliayu al valorar “tanto’l rexistru de la conxunción como la calidá artística de la semeya y la facilidá pa reconocer nella un puntu concretu de la xeografía asturiana”.

Los encargaos d’escoyer al ganador fueron un representante de l’Asociación de Fotoperiodistes d’Asturies (AFPA), miembros de delles asociaciones asturianes de fotografía y un representante de la Fundación Asturies XXI.

Esti premiu ta enmarcáu dientro la Selmana la Ciencia 2009 y cunta col sofitu de la Fundación pal Fomentu n’Asturies de la Investigación Científica Aplicada y la Tecnoloxía (FICYT). Les semeyes meyores van ser espuestes nos llocales de la Fundación Asturies XXI, en primer llugar, pa depués percorrer centros sociales, culturales y educativos, amás de difundise per Internet.