Asturtoons amuesa’l so trabayu editorial en Samartín

A partir del próximu llunes 5 de mayu, y cuando tán a puntu de cumplise 10 años dende que la editorial asturiana Asturtoons, especializada en cómic y lliteratura infantil, viera la lluz, una esposición na Casona del Bravial de Blimea entamada con motivu de la XXXV Selmana de les Lletres Asturianes fai un repasu pel so llabor. Na muestra puen vese’l casi mediu centenar de publicaciones impreses llevaes a cabu a lo llargo d’esti tiempu por esta empresa dedicada a la lliteratura infantil .

Los sos primeros llibros tuvieron centraos nos personaxes de les tires d’humor gráficu qu’Enrique Carballeira, creador de la editorial, espublizaba na prensa, y a partir d’ehí siguieron cola creación de varies coleiciones de lliteratura ilustrada, onde destaca especialmente “Llingua de trasgu”, que ye la que presenta un mayor númberu de títulos, anque tamién hai otres en marcha como la coleición “El xigante que suaña” o “El gatu pirata”, con unos llibros que destaquen pola calidá de les sos ilustraciones, les ediciones cuidaes y les histories entreteníes pa les xeneraciones más moces.

Amás del llabor d’esta editorial na edición impresa, hai que destacar tamién tolos títulos que tien espublizaos en formatu dixital, y los llibros qu’escribieron pa ella escritores como Miguel Rojo, Xavier Frías Conde, Helena Trexu o Jorge Fernández, ente otros munchos.

Esta esposición va tar abierta al públicu na Casona del Bravial de Blimea de llunes a vienres de 9 a 13 h. hasta’l próximu 23 de mayu. El próximu martes 6 y el miércoles 7 de mayu dos grupos d’escolinos,-es del conceyu van visitar la muestra de la mano del responsable de la editorial Asturtoons, el periodista, dibuxante y escritor Enrique Carballeira.