Asturies yá cuenta con un mapa d’interpretación medioambiental de les carreteres

14 ochobre 04:33 2010 Imprimir

Trátase d’un documentu que foi desendolcáu en comuña pola Asociación Española de la Carretera y l’Institutu de Seguridá Vial de la Fundación Mapfre, y que, tal y como espliquen los sos responsables “nun quier ser un mapa de carreteres al usu pues xira alredor d’unos criterios que nun tán presentes nos mapes tradicionales”. Nesti sen, el proyeutu estructúrase en tornu a dos grandes bloques: espacios naturales protexíos y accidentalidá por atropellu de fauna.

Primero, el MIMAR Asturies da información sobre los estremaos espacios naturales protexíos del país, con una calificación que va dende Parque Nacional a Paisaxe Protexíu, pasando per Parque Natural y Reserva Natural. Acordies cola Rede Natura 2000, qu’axunta los espacios naturales más ricos y estremaos de la Unión Europea, cásique la metá del territoriu d’Asturies correspuende a Sitios d’Interés Comunitariu (LIC) y Zones d’Especial Proteición (ZEPA), categoríes qu’engloben daqué más de 50 espacios protexíos nel Principáu.

Per otra banda, da información concreta sobre les zones onde se rexistren atropellos de fauna cola fin de que’l conductor pueda tomar les midíes de precaución precises al circular per estes zones. L’estudiu identifica los Tramos de Concentración d’Atropellos d’Animales (TCAA) qu’esisten en tola rede de carreteres que percuerren Asturies, ye dicir, los tramos de carretera con un máximu de 20 quilómetros nos que se rexistraron tres o más atropellos pel periodu analizáu.

Pal trabayu tomáronse como base les estadístiques apurríes pola Direición Xeneral de Tráficu (DGT) pal periodu que va ente xunu de 2005 y xunetu de 2006. Con ello, la AEC llegó a la conclusión de que nel estáu hai 848 TCAA, de los que 44 s’alcuentren n’Asturies.

Nesti sen, el MIMAR Asturies analizó 907 quilómetros de rede viaria, nos que se produxeron 690 atropellos de fauna. La especie más amenazada fueron los xabalinos, que concentren el 63% de los siniestros. Siguida de cerca pol corzu, que ye’l segundu animal más atropelláu na rede viaria d’Asturies.

  Categories:
Loading Facebook Comments ...