Asturies vuelve a salir a la cai pidiendo la oficialidá esti vienres n’Uviéu

by asturnet | abril 30, 2013 4:47 am

[1]

Un añu más, organizaciones polítiques, sociales, culturales y toa triba de persones, van salir a les cais d’Uviéu pa reclamar la oficialidá de la llingua asturiana. Sedrá esti vienres, 3 de mayu, de magar les siete la tarde y con salida dende la Estación del Norte d’Uviéu, percorriendo la cai Uría hasta’l Teatru Campoamor. La Xunta pola Defensa de la la Llingua Asturiana convoca esta manifestación.

Darréu d’esta manifestación, l’Academia de la Llingua Asturiana (ALLA), celebra’l XXXIV Día de les Lletres Asturianes a les 20,30 hores nel Teatru Campoamor d’Uviéu.

Nel actu acoyeráse como nuevu académicu correspondiente al profesor Don David Melendi Palacio, doctor n’Inxeniería Informática y profesor del área d’Inxeniería Telemática de la Universidá d’Uviéu, onde vien desendolcando’l so llabor investigador, siendo ún de los principales promotores na anovación de la llingua asturiana nes nueves teunoloxíes.

Esta Xunta Estraordinaria de l’Academia de la Llingua Asturiana finará col discursu institucional de la presidenta, Dª Ana María Cano González.

L’actu, pal que la entrada ye llibre, como davezu, tará presentáu por Sonia Avellaneda y Próspero Morán, director d’ASTURNEWS y cuntará con un entamu musical a cargu del gaiteru Álvaro Cueto. Como pieslle tendrá l’actuación del cantautor Toli Morilla.

Endnotes:
  1. [Image]: http://asturnews.com/bancofotos/fotos/2/6259.jpg

Source URL: http://asturnews.com/asturies-vuelve-a-salir-a-la-cai-pidiendo-la-oficialida-esti-vienres-nuvieu/