Portada Conceyos Asturies suspende los festexos de xunu y dellos otros del branu

Asturies suspende los festexos de xunu y dellos otros del branu

by asturnet
Foto: Nacho (https://www.flickr.com/photos/gonmi/)

Asturies suspende los principales festexos de xunu, y el restu queda a la espera de les decisiones del Gobiernu. Los conceyos tan buscando fórmules pa intentar salvar les sos fiestes, pero dan por fechu que les folixes masives nun van poder celebrase.

Conceyos y organizadores de festexos nun s’atreven a tomar decisiones drástiques sobro delles de les fiestes más destacaes del calendariu veraniegu d’Asturies, a la espera de lo que decida’l Gobiernu central nel procesu de desescalada de la pandemia del coronavirus, pero en dellos casos  túvose qu’optar pola so cancelación. Dalgunos son grandes llamaos turísticos de la rexón, como’l Descensu del Sella, la Selmana Grande de Xixón, la Fiesta del Corderu del prau Llagüezos o’l tornéu de tenis-sablera de Lluanco.

Pero munchos otros escolguen d’un filo y, cola fin d’estrumir l’últimu filu d’esperanza, munchos conceyos busquen fórmules que llinden l’accesu de públicu a les fiestes, como pue ser un Carmín de la Pola solu pa socios. Pero la realidá ye que casi naide sabe qué faer con festexos como’l Festival de la Sardina, en Candás; el Xiringüelu, en Pravia; el Descensu Folclóricu del Nalón, en Llaviana; San Timoteo, en L.luarca, o la Descarga, en Cangas.

Festivales como Aquasella o Riverland, que se celebren a finales de xunetu en Les Arriondes, van siguir alantre «hasta que’l Gobiernu decrete de forma oficial la imposibilidá de realizar grandes eventos», dicen los sos organizadores. Pel so llau, los responsables de les fiestes llanisques de La Madalena o San Roque falen de «incertidume». Más segura paez la celebración de les fiestes de La Guía, pos se celebren en septiembre.

Nel suroccidente la mayor incertidume entama sobre les fiestes del Carmen y La Madalena, en Cangas, cola tradicional Descarga. La Federación de Peñes de la Pólvora yá antemanó que nun va tramitar nenguna xestión, pero el organizadores tán por cuenta de lo qu’indique la Delegación del Gobiernu. Tinéu dulda de la celebración de San Roque, ente que n’Ayande tán más seles coles Fiestes de l’Ablana, que se celebren en septiembre, pos «esperamos que la evolución de la pandemia sía favorable aquel día», indicó l’alcalde, José Antonio Mesa.

En Lluanco yá se decidió suspender les fiestes del Carmen, sacante la misa de campaña nel muelle, y el tornéu de tenis-sable,  ente que’l concursu hípicu queda a la espera. Na vecina localidá de Candás optaron pola celebración virtual de San Antonio, la Foguera de San Juan y el Mercáu Clariniano. El Conceyu de Carreño espera poder celebrar, anque con variaciones, la Feria de la Conserva y el Festival de la Sardina.

En Pravia, la Confrería del Xiringüelu entá nun tomaron una decisión pa una fiesta que se debería celebrar el 9 d’agostu. Esperen a la evolución de los acontecimientos y de la normativa qu’aplique’l Gobiernu central. Lo mesmo asocede con San Timoteo, en L.luarca. Pel so llau, en Cuideiru solo va caltenese la llectura del pregón de L’Amuravela de les sos fiestes de San Pedro.
Garantizar la seguridá

Y nel Nalón, La Felguera yá suspendió la festividá de San Pedro y sigue trabayándose pa intentar celebrar fiestes como Santiago, en Sama; el Descensu Folclóricu del Nalón, en Llaviana, y El Carbayu, en Llangréu. Na vecina cuenca del Caudal, L.lena decidió atayar la Fiesta del Corderu porque «non puede garantizase la seguridá na esencia de la celebración, que ye l’asáu de corderu nel monte», indicó la conceyala de Festexos, Andrea Velarde. El Festival Ástur-romanu de Carabanzo entá ta nel aire. Pero quien sí caltien les sos fiestes de San Xuan ye Mieres. El so conceyal de Cultura, Juan Ponte, diz va haber munches menos actividaes «centraes en garantizar la seguridá de vecinos y visitantes».

Xixón nun va cuntar cola foguera de San Xuan y busca alternatives pa celebrar una Selmana Grande con actividaes menos multitudinaries. Los Fueos podríen ser con drones. Pel so llau, Uviéu sigue alantre cola preparación de les sos fiestes de San Mateo.

Les cites Atáyense

Descensu del Sella. Les Arriondes y Ribesella.
San Antonio. Cangues d’Onís.
Clásica de los Llagos. Cangues d’Onís.
El Carmen. Lluanco.
Tornéu de tenis-sablera. Lluanco.
San Pedro. La Felguera.
Fiesta del Corderu. L.lena.
San Xuan. Xixón.
Prestoso Fest. Cangas.
A la espera de decisión
Selmana Grande. Xixón.
Aquasella. Les Arriondes.
Riverland. Les Arriondes.
La Madalena. Llanes.
San Roque. Llanes.
La Guía. Llanes.
La Descarga. C. del Narcea.
San Roque. Tinéu.
Fiestes de l’Ablanar. Ayande.
Concursu hípicu. Lluanco.
Feria de la Conserva. Candás.
Festival de la Sardina. Candás.
El Cristu. Candás.
El Xiringüelu. Pravia.
Descensu Folclóricu del Nalón. Llaviana.
El Carbayu. Llangréu.
Festival ástur-romanu de Carabanzo. L.lena.
El Carmín. Pola de Siero.
San Timoteo. L.luarca.

Tamién te podria gustar