Portada Sociedá Asturies suspende en contaminación nel entamu la Cume de París

Asturies suspende en contaminación nel entamu la Cume de París

by redacción asturnews
Imaxe de la ñube contaminante d'Arcelor Veriña

Esti lunes 30 empieza en Paris la Cume del Clima coles mires de cerrar el primer alcuerdu global de tolos países que van asistir pa frenar el cambéu climáticu y Asturies encabeza’l ranking d’emisiones de CO2.

Asturies llega un añu mas a esi importante cume colos deberes ensin faer y dende la Coordinadora Ecoloxista consideren llamentable qu’un añu mas “Asturies encabece’l ranking español d’emisiones de CO2 por habitante al emitir mas de 20 millones de tonelaes del C02 según los datos declaraos poles empreses nel Eper, que representa’l 13,25% del total nacional, d’alcuerdu al trabayu presentáu por l ‘V Analises de datos d’emisiones de CO2 n’España, entidaes suxetes a la directiva europea 2003/87/CE’ ente 2008 y 2012 en base al Protocolu de Kyoto que presentaron les empreses productores”.

Nuna rexón que representa’l 13,25 de les emisiones totales de CO2 d’España, ente que la población solo representa’l 2,5% del total y el PIB el 2,18 del d’España. Hai un claru desfase contaminante, producíu pola nuesa escesiva especialización en quemar carbones d’importación pa producir eletricidá pa otres rexones, quedándonos nós colos impactos ambientales de la producción y del tresporte d’estes peligroses actividaes.

A cada asturianu correspuéndenos 16,6 tonelaes d’emisiones de CO2 al añu, frente a un andaluz 2,9 tonelaes (Andalucía ye la rexón mas productora de C02 d’España), frente a un catalán qu’emite 2,3 tonelaes.

Hai que recordar que’l PSOE vien consintiendo dende va décades que les empreses emisores trabayen nuna evidente precariedá ambiental con emisiones percima de la normativa vixente dende va munchos años, que diz defender el cumplimientu de Kyoto y al empar solicita que se dean mas derechos d’emisión a quién yá incumplen de manera clara esto.

Los llamaos gases d’efectu invernaderu, principalmente’l dióxidu de carbonu (CO2), atropense na atmósfera y torguen que les radiaciones infrarroxes qu’emite’l planeta al calecer salgan al espaciu. Esto fai que la temperatura del planeta xuba. Estos gases siempres tuvieron presentes na atmósfera. El problema, según el consensu científicu ye que les actividaes humanes contribuyeron a romper l’equilibriu esistente. La industria, el tresporte y los usos del suelu aumentaron la concentración d’estos gases de manera alarmante.

Tamién te podria gustar