Asturies sigue a vueltes cola especialidá d’Asturianu emplegando la oficialidá como disculpa

Asturies sigue a vueltes cola especialidá d’Asturianu emplegando la oficialidá como disculpa
25 marzu 11:55 2022 Imprimir

El Ministeriu d’Educación va estudiar les propuestes del Principáu d’Asturies pa reconocer la especialidá docente d’asturianu, anque dende’l Gobiernu asturianu siguen falando de les torgues pa poder sacala adelantre mientres l’asturianu nun sía llingua oficial.

Les conseyeres d’Educación, Lydia Espina, y de Cultura, Política Llingüística y Turismu, Berta Piñán, aconceyaron esti miércoles 23 de marzu en Madrid cola ministra d’Educación y Formación Profesional, Pilar Alegría, y el secretariu d’Estáu d’Educación, Alejandro Tiana, pa defender la creación de la especialidá docente d’asturianu.

Y nes declaraciones unviaes a los medios pol Executivu, les dos conseyeres incidieron en que la reconocencia de la especialidá ye una reivindicación que tien «dificultaes» pol marcu llegal actual del asturianu, aportunando en que van siguir adelantre con ella tola llexislatura.

Nesi sentíu, Piñán reconoció la dificultá xurídica porque l’asturianu nun ye oficial: “Ye una tema bien complexa y hai una comprensión del problema que supón pa los docentes d’asturianu”, esplicó, al tiempu qu’amosaba les munches dificultaes y dicíase sollerte ante  cualquier vía nueva xurídica que se puea abrir. Poro, munches otres voces ponen enriba la mesa cómo hay especialidaes de llingües estranxeres que, dende llueu, nun son oficiales na comunidá autónoma.

Per otru llau, Espina recordó qu’hai más de 270 docentes, dalgunos dando clase dende l’añu 1984, que por ser profesores d’asturianu nun pueden opositar, estabilizar la so plaza o faer un concursu de tresllaos.

Loading Facebook Comments ...