Portada Lorient 2004 Asturies regresa a Lorient col envís de superar l’altu nivel amosáu na edición anterior

Asturies regresa a Lorient col envís de superar l’altu nivel amosáu na edición anterior

by asturnet

Esbardu, Gatos del Fornu, Muyeres, Ramón Prada y Chus Pedro Suárez. Esi ye l’orde col que los grupos y solistes integrantes de la delegación asturiana nel Festival Intercélticu de Lorient 2004 saldrán a escena nel certame bretón, que va prollongase hasta’l 8 d’agostu y del qu’esta páxina web va ufrir información diaria a partir de mañana.

La delegación d’unviaos asturianos alcuéntrase yá na llocalidá de Bretaña col envís de mantener altu’l pabellón un añu depués que’l certame se dedicare espresamente a Asturies. Nesta edición, el protagonista sedrá L’Acadie, una rexón canadiense que cellebra los 400 años de la so fundación.

El grupu de baille Esbardu estrenará la representación activa d’Asturies nun espectáculu de dancies previstu pa primer hora de la tarde’l sábadu 31 de xunetu, nel cabaret del certame. El relevu garrarálu la banda uvieína de folk Gatos del Fornu, protagonista d’un conciertu el 2 d’agostu xunta los galegos Os Enxebres de Cacheiras y de nueu enriba les tables el 3 y el 4 d’agostu, en sendos recitales nel Palaciu de Congresos y nel denomináu ‘Espaciu festival’.

Esi mesmu miércoles 4 d’agostu, el collectivu Muyeres participará nun espectáculu de música relixosa na ilesia de San Lluis, na viéspora l’estrenu del que’l delegáu del Intercélticu n’Asturies, Lisardo Lombardía, considera’l ‘platu fuerte’ de la representación asturiana: L’estrenu de la composición ‘Kelthiké’, concebida espresamente pal festival con gran presencia’l repertoriu vocal tradicional.

El 6 d’agostu, vienres, sedrá’l turnu de Chus Pedro Suárez, qu’actuará acompañáu de Muyeres nel Grand Theatre, mientres qu’Esbardu volverá cobrar protagonismu nes dos últimes xornaes del certame. Completen la delegación asturiana unviada a Lorient les bandes de gaites de Candás y La Reina’l Truébano.

Tamién te podria gustar