Asturies llámate a defender la música “en vivu”

Asturies llámate a defender la música “en vivu”
01 setiembre 12:14 2015 Imprimir

Una campaña en Change.org pide al Principáu qu’igue la Llei d’Espectáculos Públicos y Actividaes Recreatives que dexa emitir música grabada hasta 90 decibelios, pero non el cantar “en vivu” o que se toque nengún tipu de tema musical.

Agora mesmo la música en directu ye illegal en cualquier chigre d’Asturies, anque tea insonorizao y tenga llicencia pa música amplificada, y como se diz nel manifiestu de Change.org qu’acaben d’entamar músicos asturianos y llevaba esti llunes la metá de les 5000 firmes que piden, “nun ye una tema de ruios, nin d’horarios, nin de seguridá: Ye un problema deriváu d’un desenvolvimientu insuficiente de la Llei d’Espectáculos Públicos y Actividaes Recreatives del Principáu d’Asturies, que tien competencia esclusiva na materia”.

Nel desenvolvimientu d’esta Llei, por erru o desconocimientu, resalvóse’l papel de los chigres como axente cultural y la so importancia pal desenvolvimientu de la música en directu. La Llei dexa emitir música grabada hasta 90 decibelios, pero non el cantar “en vivu” o que se toque nengún tipu de preséu musical.

Nel manifiestu de Change.org pa que’l Principáu camude la Llei dizse que “los conciertos en chigres son una práctica normal y habitual en toa Asturies, y en tol mundu. Beneficien al texíu cultural y empresarial, y son l’hábitat natural de bien de formaciones musicales. L’Alministración nun puede ignorar esta realidá social, nin tanto condergala a la illegalidá”.

Músicos, programadores de conciertos y públicu quieren camudar esta xirigonza lexislativa y na so opinión, basta con camudar tres palabres de la Llei, pa lo que quieren dexar claro lo que piden y lo que non:

-Pidimos que nun se discrimine nin s’escuerra a los músicos nin a la música en directu.
-Pidimos qu’un chigre con llicencia pa música amplificada pueda emitir música dientro de les llendes de la so llicencia.
-Que nun importe si la música sale d’un tocadiscos, un cantante d’ópera, un violinista o un grupu de música.

Qué ye lo que nun pidimos:

-Nun pidimos que los chigres puedan faer más ruiu.
-Nun pidimos que s’amplíen los horarios.
-Nun pidimos que s’incumplan los aforos nin normes de seguridá.”

Nel pidimientu de firmes descríbese fondamente’l fundamentu llegal de la prohibición y pídese modificar la Llei 8/2002, de 21 d’ochobre, d’Espectáculos Públicos y Actividaes Recreatives, del Principáu d’Asturies, y el so (insuficiente) desenvolvimientu por aciu el Decretu 91/2004, de 11 de payares.

Concretamente proponse modificar el decretu 91/2004 de la siguiente forma:

1. Treslladar los locales con música amplificada” al epígrafe correspondiente a locales habilitaos pa espectáculos públicos y culturales”.

2. Añedir tres palabres (“o en vivu”) a la definición d’estos locales que quedaría asina: “pudiendo disponer de música grabada o en vivu que la so emisión hai de respetar los topes decibélicos establecíos pola normativa a valir”.

Loading Facebook Comments ...