Asturies gana otra vuelta’l Macallan nel Festival Intercélticu de Lorient con Ángel Domingo

Ángel Domingo, un mozu asturianu tan bon gaiteru como cenciellu nel tratu, nun yera a creer ayeri que lu nomaren ganador del Certame más prestixosu de gaita del mundu: el Troféu Macallan del Festival Intercélticu de Lorient, que nesta edición 2004 tien el nome de Maccrimmon por mor de la llei que nun dexa xunir marques d’alcohol con certames culturales. Los cuatro representantes asturianos ficieron un bon concursu, quedando amás en bones posiciones, con un tercer puestu pal ya veteranu Iñaki Sánchez Santianes, y dos quintos puestos pa Jorge Suárez Carbajal y Marco Antonio Guardado.

La XIX edición del certame axuntaba a nueve concursantes, cuatro d’ellos gallegos (Alberto Tojo, Daiel Lumbreras, Brais Paz, y Álvaro Costa) y otros tantos asturianos (Jorge Suárez Carbajal Iñaki Sánchez Santianes, Ángel Domingo y Marco Antonio Guardado) y un bretón, Emmanuel Frin (qu’a lo postrero nun fue a presentase), y por primera vegada dende hai munchu tiempu un númberu perpequeñu de persones siguiendo les evoluciones de los intérpretes.

En tou casu, l’actividá cimera del Festival de Lorient nun podía entamar meyor, porque’l ganador del Concursu Maccrimmon, en realidá’l Macallan de tola vida, yera un gaiteru asturianu, Ángel Domingo, que por mor d’una perbona interpretación de la música bretona algamó la meyor puntuación del xuráu bretón, tanto nes pieces bretones como nes asturianes y nes gallegues, colo que la ventaxa quedó fondamente marcada con independencia de les puntuaciones de los xuraos asturianos y gallegos. Ye’l primer añu en que’l Macallan ye Maccrimmon y tamién nel qu’un gaiteru bretón se presenta a concursu coles nueves riegles del certame, estrenaes un añu enantes, que fain a gallegos y asturianos tocar pieces bretones pa iguar los empates que davezu ufiertaba’l concursu y qu’acababen siempre con resultaos que nun solíen satisfacer.

La presencia d’un xuráu bretón, qu’a lo postrero yera siempre’l que decidía, ye agora entá más importante que nunca, dende que les pieces bretones tienen de ser ensayaes ya interpretaes polos concursantes.