Asturies despide esti vienres a la conceyala Yolanda Huergo en Xixón

by redacción asturnews | agosto 7, 2020 2:06 pm

La conceyala Yolanda González Huergo, vocera del grupu municipal Podemos-Equo Xixón, dexonos na madrugada del xueves a los 49 años de resultes d’un cáncer que-y fuera detectáu hai más d’una década. La conceyala, que tuvo ingresada l’últimu mes nel Hospital de Cabueñes, va ser dispidida esta tarde a les cinco nuna ceremonia civil.

Nacía en Roces en 1971, estudió Derechu na Universidá d’Uviéu, anque la so trayectoria profesional tuvo amestada a l’alministración. Y tres casi xuna década d’oposiciones y curties interinidaes nel Conceyu de Xixón -atendiendo al públicu na Antigua Pescadería y nel serviciu de llicencies-, en 2004 incorporóse como técnica d’Alministración xeneral al Conceyu de Siero, en que’l so área d’Urbanismu tuvo trabayando hasta la so lliberación va un añu para la dedicación esclusiva a les sos nueves responsabilidaes de concejala.

Con una llarga trayectoria política nel ámbitu de la esquierda y l’asturianismu, dende Izquierda Asturiana, al traviés de la cual entró n’Unidá Nacionalista Asturiana, Yolanda ocupó nes autonómiques de 2011 y 2012 el segundu puestu pola circunscripción central de la coalición conformada por UNA y Bloque por Asturies, que derivó dempués en Compromisu por Asturies. D’ende pasaría a Podemos, onde en 2018 entró nel conseyu ciudadanu de Xixón como parte de la candidatura a la Secretaría Xeneral de Mario Suárez. A principios de 2019 foi escoyida en primaries candidata a l’alcaldía de la coalición formada por Podemos y Equo.

Yolanda llevaba tola vida xunida a la Xunta Pola Defensa de la Llingua, onde participaba de manera activa, dientro del equipu de xuristes qu’ellaboraron la so última propuesta formal de reforma del Estatutu d’Autonomía pa la reconocencia de la oficialidá. Al pie de la defensa del asturianu, ente les sos principales esmoliciones tuvo siempres la defensa de los derechos humanos en tol mundu, dende Amnistía Internacional, organización cola que siguía collaborando.

Esti vienres, a les 17 hores, va celebrase un actu civil nel tanatorio de Cabueñes pa despedir con ciñiu a esta asturiana comprometía cola so tierra y la so cultura.

Source URL: http://asturnews.com/asturies-despide-esti-vienres-a-la-conceyala-yolanda-huergo-en-xixon/