Asturies celebra’l Día del Llibru con actos per tol país y descuentos nes llibreríes

23 abril 08:53 2008 Imprimir

Asturies va celebrar güei un añu más el Día Internacional del Llibru y esti añu la programación vien cargada d’actividaes en tolos puntos del país. Unos actos a los que va xuntase la celebración de munches de les llibreríes del país, que nesti día ufren descuentos y promociones nes ventes. N’Asturnews facemos un repás completu a los actos del día.

Nel apartáu de les llibreríes que van celebrar esti día, ta la célebre llibrería Alborá Llibros de Xixón, que va ufrir a lo llargo de güei un descuentu del 10% na compra de llibros, a los que va acompañase’l regalu d’una flor.

No que cinca a los actos lliterarios Llangréu va convidar a la llectura pública qu’esti añu va facese en Ciañu n’alcordanza y homenaxe a José León Delestal. Pero’l Día del Llibru va allargase nesti conceyu. Dende’l día 2 de mayu y hasta’l 16 de mayu va poder visitase na Casa la Cultura Sama la esposición El País de Graeslinjú, un llugar máxicu onde viven los grandes escritores de la lliteratura infantil y mozo. Les sos vides, les sos histories y los sos grandes personaxes al traviés d’un percorríu enllenu fantasía, misteriu ya imaxinación. Rescamplen tamién la campaña d’animación a la llectura en llingua asturiana y les conferencies que van poner Luis Sepúlveda y Diego Medrano, amás del actu Presentaciones cruzaes nel qu’escritores de la sonadía de Pablo Antón Marín Estrada, Pablo Rodríguez Medina y Naciu Varillas presentarán y falarán de les sos últimes obres: Secretos y dos sombres, Perreríes y El camín de Dios.

Nel Barriu de La Calzada, en Xixón, va celebrase güei una feria del llibru cabo l’Atenéu na que van participar les llibreríes Seshar, Amez y Acuarel. A les 18:00 hores va producise l’actuación del magu Norber, darréu una firma de llibros a cargu de la escritora Pilar Sánchez Vicente. A les siete la tarde va producise l’actución del Dj Nacho de La Vega y media hora más tarde, la vidioproyección “Lázaro de Tormes”.

N’Uviéu, El Conseyu de la Mocedá va celebrar el Día del Llibru con una singular iniciativa basada na práctica del “crossbooking”. El día enantes dellos xóvenes collaboradores van dexar en delles ubicaciones de la capital, nueve obres lliteraries d’autores xóvenes asturianos pa que’l que los atope pueda descubrir el so trabayu. Nes tapes de los llibros va dir una pegatina cola invitación de ller el llibru y volver a dexalu n’otra ubicación asina como una rellación de les doce biblioteques de la ciudá. Los llibros que van tar espardíos pela ciudá nesta actividá son: “El país del silenciu” de Vanessa Gutiérrez y Beatriz R. Viado; “De andar por casa” de Sergio Varela; “Un poemario” de Teresa Soto; “Los sueños diurnos, manual de amantes, pobres y asesinos” de Diego Medrano; “Catalina y los bosques de hormigón” de David Acera y Ana Laura Barros; “Espejo” de Miguel Barrero; “No llegaré vivo al viernes” de Nacho Guirado; “Argonautes” de José Ángel Gayol y “El final del cuento” d’Inés Toledo.

A esta actividá va axuntase tamién la Universidá d’Uviéu, que magar de tar nel día de les sos elecciones a Rector, va repartir delles obres espublizaes pol so Serviciu de Publicaciones. Les escoyíes pa esta ocasión son ‘Mi viaje a América’ de Rafael Altamira, ‘Michel Foucault, caja de herramientas contra la dominación’ de Juan Pastor, Anastasio Ovejero y ‘La memoria posible’ d’Eduardo San José.

Nel Centru Polivalente de Candás, a les 19 hores, va celebrase la presentación d’“El color del escaezu”, novela de los que son autores Marián García, Profesora de Llingua Asturiana nel IES Candás, y Xurde Fernández, Profesor de Llingua Asturiana nel IES Cristo del Socorro de Lluanco.

D’otra banda, la lliteratura asturiana va tar presente n’otros llugares fuera del país. Y ye que Xuan Bello va participar en Barcelona nel Día Internacional del Llibru, presentando la versión catalana del “Història Universal de Paniceiros”, acabante editar pol sellu Adesiara. La presentación va ser en Barcelona, dientro de los actos de Sant Jordi, y cola apaición en dellos programes de radio y televisión, una atopada colos medios de comunicación acompañáu por Quim Monzó y la firma d’exemplares na Llibrería LaCentral (Rambla de Catalunya, esquina Mallorca) a partir de les 19:00.

  Categories:
Loading Facebook Comments ...