Asturies abre’l ciclu de cine turísticu ‘Spanien, ein Land wie in Filme’ nel Institutu Cervantes de Frankfurt

12 11:09 2013 Imprimir

Asturies va ser la comunidçá autónoma española cola qu’entame un ciclu de cine turísticu que baxo’l títulu ‘Spanien, ein Land wie in Filme’ (España, un país de película), va desenvolvese nel Institutu Cervantes de Frankfurt dende’l día 18 de noviembre hasta’l 9 d’avientu. El certame, entamáu pola Oficina Española de Turismu en Frankfurt en collaboración coles entidaes de promoción turística autonómiques, ente elles la Conseyería d’Economía y Emplegu d’Asturies, pretende promocionar España ante’l mercáu alemán como destín turísticu y cultural al traviés del cine.

La película escoyida p’abrir el ciclu foi ‘Para qué sirve un osu’, dirixida pol realizador asturianu Tom Fernández y patrocinada pol Gobiernu del Principáu. Estrenáu en 2011 y rodáu mayoritariamente n’espacios naturales del Camín Real de La Mesa, el llargumetraxe amuesa la vinculación d’Asturies col osu pardu nuna hestoria de concienciación ambiental que sirve, de la mesma, d’escaparate a los paisaxes del osu cantábricu. La película comparte cartelu con otres producciones como ‘El Camín’, d’Emilio Estévez, o ‘Namái se vive una vegada’, de Zoya Akhtar.

El públicu qu’asista a les proyecciones va recibir material informativo y promocional de cada unu de los destinos que protagonicen el ciclu, ente ellos Asturies. El certame va cuntar, amás, con un pase empobináu a públicu profesional del sector turísticu y prensa especializada alemana.

  Categories:
Loading Facebook Comments ...